Энэ сарын 08-ны өдөр хилийн цэргийн 275 дугаар ангийн 5 дугаар заставын Үмхийтийн харуул буюу ОХУ-аас хилийн 923 дугаар тэмдэгтээр түймэр орж иржээ. Түймэрт Дорнод аймгийн Дашбалбар, Чулуунхороот, Гурванзагал, Чойбалсан сумдын нутгийг дамнан шатсан ба салхины чиглэл тогтворгүй 17м/с хүртэл салхитай байсан нь түймэр богино хугацаанд газар авч, дөрвөн сумын 1.33 сая га бэлчээрийн талбай шатсныг урьдчилсан байдлаар тогтоожээ. Түймрийг өнгөрсөн шөнө унтраасан бөгөөд нийт 22 машин техник, 200 хүн гаруй хүн хүч ажиллаж унтраасан байна. 

Түймрийн улмаас Чулуунхороот сумын Галуут, Цагаан чулуут багуудын 14 айл түймэрт өртсөнөөс дийлэнх хувийг нь гэр, байшин, малын хашаа саравч, пин, мотоцикль, тодорхойгүй тооны мал эзэлж байгаа тухай мэдээллийг аймгийн Онцгой байдлын хэлтсээс ирүүлээд байна.

Он гарсаар Дорнод аймгийн Булган,  Баяндун,  Сэргэлэн, Чулуунхороот, Чойбалсан, Дашбалбар, Гурванзагал, Баянтүмэн сумдад нийт 10 удаагийн тал хээрийн түймэр гарчээ. Одоогийн байдлаар таван түймрийн эзэн холбогдогч нь тогтоогдсон ба үлдсэн түймрийн эзэн холбогдогчийг нь тогтоолгохоор цагдаагийн байгууллага шалгаж байгаа аж.

Дээрхи түймрүүдэд нийт 1,5 сая га бэлчээрийн талбай шатаж байгаль экологид 61.3 сая төгрөгийн хохирол учирчээ.