НҮБ-ын өндөр зиндааны төлөөлөгч Монгол Улсад айлчилж байна. НҮБ-ын Ерөнхий нарийн бичгийн даргын орлогч, Ази, Номхон далайн Эдийн засаг, нийгмийн комиссын гүйцэтгэх нарийн бичгийн дарга хатагтай Ноэлин Хэйзер өчигдөр шөнө 22.00 цаг өнгөрч байхад Улаанбаатарт хүрэлцэн иржээ. Өнөө өглөө 09.15 цагт ГХЯ-нд ирж Монгол Улсын Ерөнхий сайд С.Батболд, Гадаад харилцааны сайд Г.Занданшатар нартай товч уулзалт хийснээр хатагтайн айлчлалын албан ёсны хөтөлбөр эхэлсэн байна.  Г.Занданшатар  сайдын урилгаар хатагтай Ноэлин Хэйзерын  Монгол Улсад хийж буй албан ёсны айлчлал энэ сарын 11-15-ны өдрүүдэд үргэлжилнэ.

Айлчлалынхаа хүрээнд хатагтай Ноэлин Хэйзер Монгол Улсын Ерөнхийлөгч Ц.Элбэгдорж, Ерөнхий сайд С.Батболд нарт бараалхаж Гадаад харилцааны сайд Г.Занданшатар, Сангийн сайд С.Баярцогт, Нийгмийн хамгаалал, хөдөлмөрийн сайд Т.Ганди, Зам тээвэр, барилга, хот байгуулалтын сайд Х.Баттулга нартай уулзан, харилцаа, хамтын ажиллагааны талаар санал солилцох ажээ.

Өнөөдөр хатагтай Ноэлин Хэйзер Улаанбаатарт эхэлж байгаа Ази, Номхон далайн бүсийн далайд гарцгүй хөгжиж буй орнуудын өндөр төвшний бодлогын уулзалтад оролцож байна. Үдээс хойш Монгол Улсын Ерөнхийлөгч Ц.Элбэгдоржид бараалхаж Т.Ганди сайдтай уулзах юм.

Хатагтай айлчлах хугацаандаа дандаа албан ажилд дарагдахгүй бололтой. Маргааш Цонжин болдогт очиж малчин айлд зочлоод үдээс хойш МУИС-д лекц уншиж тус сургуулийн Хүндэт докторын цолыг хүртэх ажээ. Нөгөөдөр албан ажлынхаа завсраар  “Говь” үйлдвэрийн бүтээгдэхүүний дэлгүүрт зочлох юм байна.