Боловсрол шинжлэх ухааны яам, Насан туршийн боловсролын үндэсний төв, НҮБ-ийн Хүүхдийн сан хамтран “Насан туршийн боловсрол” үндэсний форумыг  өчигдрөөс эхлүүлжээ. Тус форумаар албан бус боловсролын байгууллагын гүйцэтгэх үүрэг ба оролцоог дүгнэж, уг боловсролын тогтолцооны шинэ хандлага болох “Насан туршийн боловсролын тогтолцоог хөгжүүлэх чиг хандлага, хэтийн төлөв”-ийг хэлэлцэж байгаа юм. Форумын үеэр Насан туршийн боловсролын төвийн захирал Е.Батчулуун “Нийгмийн хөгжлийг дагаад албан бус боловсролын сургалтын систем өөрчлөгдөх ёстой. Албан бус боловсрол нь цаг хугацааны хувьд урт настай боловсролыг хүнд олгодог” хэмээн онцолж байлаа.
 
Манай улсын ерөнхий боловсролын сургалтын арга барил хэт шинжлэх ухааны тал руу чиглэсэн байдаг бөгөөд, сурагчдад амьдрах ухаан сургадаггүй нь манай сургалтын тогтолцооны нэг  дуталтай тал гэдгийг мэргэжилтнүүд хэлдэг. Тэгвэл албан бус боловсролын байгууллага нь сурагчдад төдийгүй бүх насны иргэдэд зориулсан чиглэсэн, хүнийг хүн болгон төлөвшүүлэхэд чиглэсэн сургалт явуулдгаараа онцлог аж.  Өдгөө бүх аймаг, нийслэлийн есөн дүүрэгт албан бус боловсролын “Гэгээрэл”-ийн төв байдаг ч төрөөс олгож буй санхүүжилт тэдний сургалт, үйл ажиллагаанд хангалттай хүрэлцдэггүйг Насан туршийн боловсролын байгууллагын мэргэжилтнүүд хэлэв. Сургалтад шаардлагатай тоног төхөөрөмж, байр ч дутагдалтай байдаг ажээ.