Авлигад авсан их хэмжээний мөнгийг сонгуулийн сурталчилгаандаа ашиглаж УИХ-ын гишүүний сэнтийд заларсан гэх Д.Дондогийн хэргийг хэзээ, хэрхэн дэнслэх нь олны анхаарлыг татсан хэвээр. Түүнийг УИХ-ын гишүүнээр ажиллаж байх үед хуулийнхан шалгаж эхэлсэн боловч УИХ-ын гишүүний бүрэн эрхийн хүрээнд хэргийг хянаж, шийдвэрлэх явцад саад учраад байсан юм. Тухайн үед нийслэлийн Прокурорын газраас түүний эрхийг түдгэлзүүлэх асуудлыг УИХ-д удаа дараа тавьж байсан ч хүлээж аваагүй юм. Харин тэрбээр УИХ-ын гишүүнээс буусан тул холбогдох хэргийг өнгөрсөн зунаас эхлэн дахин шалгаж эхэлсэн юм.

 Ямартай ч түүний хэргийг энэ хоёрдугаар сард багтаан шүүн хэлэлцэх нь тодорхой бололтой. Учир нь Д.Дондог нарт холбогдох хэргийг Нийслэлийн прокурорын газар хянаж дуусаад, өнгөрсөн нэгдүгээр сарын 26-нд Сүхбаатар дүүргийн шүүхэд шилжүүлсэн бөгөөд анхан шатны шүүх хэргийг хүлээн аваад 30 хоногийн дотор шүүх хурлын товыг зарлах учиртай юм. Сүхбаатар дүүргийн албаны эх сурвалжаас тодруулахад “Д.Дондог нарын шүүх хурал дараа долоо хоногт товлогдоно” гэв. Мөрдөн байцаалтын явцад Д.Дондог нь өнгөрсөн 2008 оны хоёрдугаар сарын 8-нд өөрийн шадар туслах Г.Сайнбаяртай хамтран “Меридан” гэх компанид орон сууц барих газрын зөвшөөрөл гаргаж өгөх нэрийдлээр 242 мянган ам.доллар буюу 400 орчим сая төгрөг залилж, сонгуулийн сурталчилгаанд ашигласан гэдгийг тогтоогоод байгаа. Түүний залилангийн хэрэгт туслах Г.Сайнбаяр, А.Батбилэг, Л.Мөнхсайхан, А.Ариунболд, Д.Баасанхүү нарын 10 гаруй хүнийг холбогдуулан сэжигтнээр татаад байгаа юм.

Гишүүн асан Д.Дондогийн анхан шатны шүүхээс гэм буруутай гэж үзвэл эд хөрөнгийг хурааж, 10-15 жилийн ял оноох юм.