Францын баруун хэсгийн Нант хотод оршин суудаг 43 настай эрэгтэй ажилгүйдлийн тэтгэмжинд хамрагдаж чадаагүйн улмаас хөдөлмөр зохицуулах товчооны байрны гадна өөрийгөө шатаажээ. Тэрээр улсаас олгодог ажилгүйдлийн тэтгэмжинд хамрагдах бүх нөхцөлийг хангасан боловч тэтгэмжинд хамруулаагүйг эсэргүүцэж, өөрийгөө шатаасан байна. Нант хотын цагдаагийн газрын мэдээлснээр цагдаа нар тэрхүү эрэгтэйг өөрийгөө шатаахыг болиулахыг оролдсон ч тэрээр өөрийнхөө дээрээс шатахуун асгаж, галдсан байна. Үүнээс өмнө тэрээр Францын “Presse-Ocean” сонинд хандаж, олон нийтийн өмнө өөрийгөө шатаахаа удаа дараа мэдэгдэж байсан аж.

Түүнчлэн Францын хөрш Испани улсын Малага хотод бас нэгэн эрэгтэй ажлын байр хомс байгаагаас ажилд орж чадахгүй байгааг эсэргүүцэн өөрийгөө шатаан амь үрэгдсэн байна. Франц, Испани зэрэг орны иргэд иймэрхүү байдлаар өөрийгөө шатааж, эсэргүүцлээ илэрхийлэх болсон нь Европын холбоонд эдийн засгийн хямралаас үүдэлтэй ажилгүйдэл эрс нэмэгдсэнтэй холбоотой гэж зарим шинжээчид дүгнэжээ.

Францад сүүлийн жилүүдэд ажилгүйдлийн төвшин өнгөрсөн 12 жилийн хугацаанд байгаагүй хэмжээнд хүрч, эрс нэмэгдсэн байна. Сүүлд хийсэн судалгаагаар Францад хөдөлмөрийн насны гурван сая гаруй хүн ажилгүй байна гэсэн үзүүлэлт гарчээ.