Цагаан сарын битүүний үдэш буюу энэ сарын 10-11-нд шилжих шөнө С.Зоригийн хэрэгтэй холбогдсон гэх хоёр хүнийг баривчлах ажиллагааг АНУ-ын тусгай хүчний 20 гаруй цагдаа гүйцэтгэсэн талаарх мэдээлэл хэвлэлээр цацагдаж байгаа билээ. Энэ мэдээллийн үнэн эсэх талаар Монгол Улсын ерөнхий прокурорын орлогч Г.Эрдэнэбатаас тодрууллаа.

-С.Зоригийн хэрэгтэй холбогдуулан Ч, Х нарын Монголын хоёр иргэнийг АНУ-ын тусгай хүчний 20 гаруй цагдаа баривчилсан тухай мэдээлэл сүүлийн үед цахим хуудсуудаар цацагдаж байна. Ийм баривчилгаа яг болсон уу?

-Манай талаас энэ мэдээллийг огт үндэслэлгүй, буруу ташаа мэдээлэл гэж хэлэх байна. Хэрвээ АНУ-д тусгай хүчнийхэн оролцсон томоохон ажиллагаа зохиовол манай улсын холбогдох албан тушаалтнуудад заавал мэдээлэх ёстой.

-Тэгвэл манай талаас АНУ-д хүсэлт тавиагүй, АНУ-д баривчлах ажиллагаа зохион байгуулаагүй гэж ойлгож болох уу?

-Манай зүгээс л лав ийм төрлийн хүсэлт АНУ руу явуулаагүй.