“Шүрэн бугуйвч”, “Элсний нүүдэл” зэрэг киноны дуунуудаараа олны танил болсон дуучин Б. Баярцэцэг мэргэжлийнхэн дундаа үнэлэгддэг уран бүтээлч юм. Дуучин бүсгүй зохиолч Х. Болор-Эрдэний “Намайг хүлээсэн эх орон” гэсэн уран бүтээлийг дуулахаар болж хоолойныхоо бичлэгийг хийлгэсэн байна. Энэ дуундаа тэрээр эх орноосоо хол байгаа хүмүүсийн нутгаа санасан сэтгэлийг илэрхийлэхийг зорьжээ.

Зохиолч бүсгүйн “Дурласан цас”, “Уулзвар дээр” дуунуудыг мөн Б. Баярцэцэг амилуулан дуулж, олны хүртээл болгож байлаа. “Дурласан цас” дуу нь аялгуу тансаг, мөрөөдлийн гэмээр сайхан уран бүтээл болж, дуучин бүсгүйн эвлэг, ялдам хоолойд үнэхээр зохисон бөгөөд яах аргагүй өвлийн нэг аялгуу байж, сонсогч түмний таашаалд нийцсэн билээ. Ингээд түүний “Намайг хүлээсэн эх орон” уран бүтээл хэрхэн амилж, ямар өнгөөр будагдахыг хүлээх л үлдлээ дээ.