Энэтхэгийн Дэли хотод автобусаар зорчиж явсан 23 настай бүсгүйг хүчирхийлсэн гэх таван хүнийг хүн хулгайлсан, хүчирхийлсэн, хүний амь хөнөөсөн зэрэг хэд хэдэн зүйл ангиар буруутган шүүж байгаа билээ. Гэвч тэдгээр таван сэжигтэн энэ хэрэгт ямар ч буруугүй, бүсгүйг хүчирхийлээгүй хэмээн сэжигтнүүдийн өмгөөлөгч мэдэгджээ. Гэвч прокурорын мэдэгдсэнээр сэжигтнүүдийн булай үйлдлийг гэрчлэх гурван хүн байгаа бөгөөд тэд маргааш шүүх хуралд гэрчийн мэдүүлэг өгөх юм байна. Түүнчлэн прокуроруудад сэжигтнүүдийг буруутгах гэрчийн мэдүүлгээс гадна тэдний гэм буруутайг батлах ДНК болон гар утасны бичлэг зэрэг маргашгүй нотлох баримт байгаа гэнэ. Үүний зэрэгцээ бүсгүйг хүчирхийлсэн бузар хэрэгт хамтран оролцсон зургаа дахь этгээд нь 17 настай /насанд хүрээгүй/ тул түүний хэргийг тусад нь шүүхээр болоод байгаа юм байна.
Энэтхэгийн Дэли  хотод өнгөрсөн арванхоёрдугаар сард автобусад зорчиж байсан хос руу зургаан эрэгтэй халдаж, залууг нь зодож, бүсгүйг хүчирхийлэн зодсоноос 23 настай бүсгүй гэмтлээ даалгүй Сингапурын эмнэлэгт нас барсан юм. Энэтхэгт төдийгүй дэлхий дахиныг сэрдхийлгэсэн энэхүү хэргийн улмаас Дэли хотод олон мянган хүн эмэгтэйчүүдийн эрхийг хамгаалах болон хүчирхийлэх гэмт хэрэгт оногдуулах шийтгэлийг чангатгахын төлөө жагсаал цуглаан хийсэн. Үүний ачаар Энэтхэгт эмэгтэйчүүдийн тусгай шүүх байгуулагдаад байгаа бол Засгийн газраас хүчирхийлэх гэмт хэрэгт оногдуулах шийтгэлийг чангатгах талаарх асуудлыг өнгөрсөн баасан гаригийн хуралдаанаараа авч хэлэлцсэн байна. ВВС–ийн мэдээлснээр Энэтхэгийн Засгийн газрын гишүүд  хүчирхийлэх гэмт хэргийн хэрэгтнүүдэд оногдуулах ял, шийтгэлийг чангатгахыг зөвшөөрсөн бөгөөд энэ гэмт хэргийн улмаас хохирогч амиа алдсан бол гэмт этгээдэд цаазаар авах ял оноохыг дэмжжээ.