Завхан аймгийн Яруу сумын уугуул залуу яруу найрагч А.Батсайхан “Дөрөвдүгээр сарын гурван” шүлгийн түүврээ хэвлүүлжээ. Тэрээр антропологич мэргэжилтэй бөгөөд одоо Өвөр Монголын их сургуульд магистрантурт суралцаж байгаа юм. Яруу найрагч А.Батсайхан 2008 онд “Сэтгэлийн горхиор навчис хөвнө” номоо хэвлүүлж байсан бол энэ удаа хоёр дахь номоо өлгийдөн авчээ. Түүний энэ удаагийн номонд 35 Хайку, мөн тэр хэмжээний шүлэг багтжээ.

МЭДЭХГҮЙ

Би хэний бүтээсэн
Орон зайд
Амьсгалж байгаагаа мэдэхгүй
Би хэний тогтоосон
Цагийн хэмжүүр дээр
Гишгэж яваагаа ойлгохгүй
Цаг хугацаа
Орон зай
Хэзээ эхэлсэн
Хаана дуусахыг
Хэзээ ч битгий асуу
Амьтай бүхний
Эхлэл, төгсгөлийн тухай
Адилхан шүү дээ
Бид хэний бүтээсэн
Орон зайд
Бид хэний тогтоосон
Цагийн хэмжүүрт
Хөх хот 2012 он

ЦЭЦЭГ

Атгасан гар минь
Цэцгийн сав
Үр суулгаж амьдрал сав
Үндэс соёолж сэтгэл сав
Цэцэг дэлбээлж ухаан сав
Атгасан гар минь
Дэлхий сав
Амьсгалаараа гоёсон
Хүн цэцэг
Завхан аймаг 2012 он