“Саусгоби Сэндс” компанийн хугацаа нь дуусч, цуцлаад байсан таван лицензийг хууль бусаар сэргээж, нэгийг нь найздаа шилжүүлсэн, мөн 120 орчим лицензийн зөвшөөрлийг хууль бусаар олгосон гэх хэрэгт буруутгагдаж байгаа Ашигт малтмалын газар /АМГ/-ын дарга асан Д.Батхуяг, АМГ-ын Геологи, Уул, уурхайн кадастрын дарга Т.Даваацогт, Д.Батхуягийн найз, “Зэлэм” компанийн захирал н.Жаргалсайхан, н.Бат-Ирээдүй нарын дөрвөн хүнд холбогдох авлигын гэх хэргийг Цагдан хорих 461 дүгээр ангийн шүүх хуралдааны танхимд өнөөдр гурав дахь өдрөө шүүж байна. АМГ-ын дарга асан Д.Батхуяг, түүний найз н.Жаргалсайхан нар тус хорих ангид саатуулагдаж байгаа тул Баянгол дүүргийн шүүгчид Цагдан хорих 461 дүгээр ангид очиж, хэргийг шүүж байгаа юм. 

Авлигатай тэмцэх газрын мөрдөн байцаалтын явцад Д.Батхуягийг Үндэсний аюулгүй байдлын зөвлөлөөс гаргасан ашиг малтмалын хайгуулын лиценз олголтод хязгарлалт хийх шийдвэрийг зөрчиж, 120 орчим лицензийн зөвшөөрлийг хууль бусаар олгосон болохыг тогтоосон билээ. Мөн ашиглалтын эрхийн хугацаа нь дуусч, АМГ-ын байцаагчид хайгуул хийх эрхийг нь цуцлаад байсан “Саусгоби Сэндс” компанийн хайгуулын таван лицензийг хууль бусаар сэргээж, нэг лицензийг өөрийн найз н.Жаргалсайханд шилжүүлсэн хэрэгт буруутгаж байгаа юм.

Хэргийг хянах явцдаа  Нийслэлийн орлогч прокурор Е.Сагсай “Д.Батхуяг нарт ямар шийтгэл өгөхөөс үл хамааран дээрхи хууль бус лиценз олголт, эрхийг нь сэргээсэн хайгуулын таван лицензтэй холбоотой бүх шийдвэрийг шүүхээс цуцлах байх” гэж гэж мэдэгдээд байгаа юм.