Туркийн Анталия хотноо болж буй харааны бэрхшээлтэй тамирчдын дэлхийн аварга шалгаруулах тэмцээнээс Монголын тамирчид хоёр дахь медалиа хүртлээ. Футзал, хөнгөн атлетик, жүдо, шатар, усанд сэлэлт зэрэг спортын долоон төрлөөр зохиогдож буй тус тэмцээн 2012 оны Лондонгийн паралимпийн эрх олгож буйгаараа онцлогтой.

Тэмцээний эхний өдөр буюу 5-нд хөнгөн атлетикийн Т11 (хараагүй) ангилалд ОУХМ Ж.Лхагважав, хөтлөгч А.Бакыт нар 19 минут, 01.00 секундын амжилтаар мөнгөн медаль хүртэж, Монголын баг тамирчдын амжилтын буухиаг эхлүүлсэн бол 6-ны өдөр хөнгөн атлетикийн эрэгтэйчүүдийн 10 мянган метрийн зайд Г.Мөнхбат 35.12.00 цагийн амжилтаар мөнгөн медалийн эзэн болжээ. Энэ зайд ОХУ-ын тамирчин түрүүлж, Энэтхэгийн тамирчин хүрэл медаль хүртсэн байна. Г.Мөнхбат мөн эрэгтэйчүүдийн 800 метрт өрсөлдөн финалд шалгарч, хоёр минут 12 секундын амжилт үзүүлжээ.