Дэлхийн авто зах зээлд үйлдвэрлэл болоод борлуулалтаар ноёрхож буй Японы “Toyota Motor” корпораци дэлхийн шилдэг авто үйлдвэрлэгч гэх статусаа эргүүлэн авчээ. 2011 онд Японыг нөмөрсөн гамшигт цунамийн үр нөлөөгөөр тус корпораци тэргүүлэгчийн байр сууриа тухайн жил АНУ-ын “General Motors” корпорацид алдаад байсан юм. Гэвч шургуу хөдөлмөр, брэнд бүтээгдэхүүн, стратегийн зөв бодлогын ачаар дахин амжилттай ажиллаж, 2012 оны шилдэг авто үйлдвэрлэгчээр тодорчээ.
 
“Toyota Motor” корпораци өнгөрсөн 2012 онд 9.75 сая автомашин худалдсан нь өмнөх оныхоос 22 гаруй хувиар илүү үзүүлэлттэй гарсан бол “General Motors” компани 9.29 сая автомашин борлуулснаар удаалсан байна. Түүнчлэн “Toyota Motor” корпорацийн шинжээчдийн мэдээлснээр ирэх гуравдугаар сарын 31 гэхэд корпорацийн цэвэр ашиг 780 тэрбум иен /8.6 тэрбум ам.доллар/-д хүрнэ хэмээн урьдчилан тооцоолжээ. Энэ нь өмнөх жилийн мөн үетэй харьцуулахад 20 тэрбум иенээр нэмэгдсэн үзүүлэлт юм байна.