Монгол Улсын Засгийн газраас 2010 онд дэвшүүлсэн “Бизнесийн орчныг шинэтгэх жил”-ийн хүрээнд хийсэн ажлын талаар гишүүд нухацтай хэлэлцэж байна. Улсын тэмдэгтийн хураамжийн тухай хуулиас эхлээд, эргэж харах шаардлагатай хуулиуд нэлээд бий ч гэлээ бүхнийг хараар будаж болохгүй гэрэл гэгээтэй нааштай зүйлүүд мэдрэгдэж эхэлснийг Ерөнхий сайд тодотголоо. Тухайлбал, дээрх жилийн хүрээнд аж үйлдвэрийн нийт бүтээгдэхүүний үйлдвэрлэл өмнөх оноос 10 хувиар, боловсруулах аж үйлдвэрийн салбар 11.4 хувиар өсчээ. Боловсруулах аж үйлдвэрийн салбар дотор хүнсний аж үйлдвэрлэл 24, хувцас үйлдвэрлэл 17, модон эдлэлийн үйлдвэрлэл 35.6,  төмрийн үйлдвэрлэл 29.6, эрдэс бодисоор хийсэн эдлэлийн үйлдвэрлэл 54 хувиар тус бүр нэмэгдсэн юм байна. Аж үйлдвэрийн салбарт зөвхөн бүтээгдэхүүн үйлдвэрлэлийн тоон үзүүлэлт нэмэгдээд зогсоогүй хөдөлмөрийн бүтээмж 5.5 хувиар, тус салбарт ажиллагсадын тоо өмнөх оныхоос 1.7 мянган хүнээр өссөн нь чанарын чухал үзүүлэлт хэмээн Ерөнхий сайд хэллээ.

Мөн улсын бүртгэлийн үйл ажиллагааг хөнгөвчилсний үр дүнд шинээр бүртгэгдэж буй аж ахуйн нэгжийн тоо өсөн нэмэгдсэн байна. Тухайлбал, 2009 онд шинээр бүртгэгдсэн аж ахуйн нэгжийн тоо 379-өөр нэмэгдсэн бол 2010 онд 4044 аж ахуйн нэгж шинээр бүртгэгджээ. Ингэснээр улсын хэмжээнд бүртгэгдсэн аж ахуйн нэгжийн тоо 40.9 мянгад хүрчээ. Жижиг, дунд үйлдвэрийг дэмжих чиглэлээр шат дараатай  олон арга хэмжээ авч хэрэгжүүлсний үр дүнд 581 жижиг үйлдвэр шинээр бий болж, 1041 үйлдвэр техник, технологио шинэчилж үйл ажиллагаагаа өргөжүүлсэн юм байна. Түүнийг дагаад Монгол Улсын өрсөлдөх чадвар ч зохих хэмжээгээр дээшилсэн гэв. Тодруулбал,  2010-2011 оны Өрсөлдөх чадварын тайлан судалгаагаар Монгол Улс 3.7 оноогоор 139 орноос 99 дүгээр байрт орсон нь өнгөрсөн оны үзүүлэлтээс 0.3 пунктээр дээшилж даруй 18 байраар урагшилсан гэсэн өөдрөг мэдээг дуулгалаа.