Алдарт бөх Иван Ярыгины нэрэмжит чөлөөт бөхийн олон улсын тэмцээний хоёр дахь өдөр /өчигдөр/ манай эмэгтэй бөхчүүд барилдсан бүх жиндээ медаль хүртлээ. Эмэгтэйчүүдийн 48 кг-ын жинд МУГТ, дэлхийн аваргын хүрэл медальт Ц.Энхжаргал хүрэл, 55 кг-ын жинд С.Бямбацэрэн мөнгө, 63 кг-ын жинд олимпийн хүрэлт медаль, дэлхийн аварга С.Батцэцэг хүрэл, 72 кг-ын жинд МУГТ, дэлхийн аваргын мөнгөн медальт О.Бурмаа мөнгөн медаль хүртжээ. О.Бурмаа тэмцээний аваргын төлөө Лондоны олимпийн аварга Наталья Воробьёватай барилдсан байна.

Ийнхүү эмэгтэй чөлөөт бөхийнхөн маань ОХУ-ын Красноярскт болсон тус тэмцээнээс нэг алт, хоёр мөнгө, гурван хүрэл медаль хүртлээ. Өчигдөр О.Насанбурмаа 67 кг-ын жинд алтан медаль хүртсэн бол Ш.Түмэнцэцэг мөн жинд хүрэл медаль зүүсэн тухай бид өмнө нь мэдээлсэн билээ.