Иргэдэд орон сууцны зээл олгох зорилгоор Засгийн газраас хэрэгжүүлж буй зургаан хувийн зээлээр орон сууцжуулах хөтөлбөрийг хэрэгжүүлж буй Төрийн банк багагүй хэл ам дагуулаад байсан юм. ТУЗ-ийн гишүүд нь авлига авсан, танил талаар дамжуулан зээл олгодог, ТУЗ-ийн гишүүд нь мөнгө хувааж завшсан зэргээр шуугиан тариад байсан юм. Тэгвэл өнгөрч буй долоо хоногт Төрийн банкны гүйцэтгэх захирал, Төлөөлөн удирдах зөвлөлийн гишүүдийг үүрэгт ажлаас нь чөлөөлж, шинэ удирдлагуудыг томилсон байна.

Тодруулбал, Төрийн банкны гүйцэтгэх захирал Ж.Отгобилэгийг ажилдаа хариуцлагагүй хандсан гэж үзэж үүрэгт ажлаас нь чөлөөлж, Д.Батсайханыг томилсон талаар бид мэдээлсэн.

Төлөөлөн удирдах зөвлөлийн даргаар  Сангийн яамны Төсвийн бодлогын хэлтсийн дарга Ж.Ганбат, ТУЗ-ийн гишүүдээр Засгийн газрын Хэрэг эрхлэх газрын дэд дарга Г.Дэнзэн, Төрийн өмчийн хорооны дэд дарга Ж.Төмөрбаатар, Сангийн яамны Төсвийн санхүүжилт, зохицуулалтын газрын дарга Т.Доржханд, Хууль зүйн яамны Бодлогын хэрэгжилтийг зохицуулах газрын дарга О.Алтангэрэл, Сангийн яамны Дотоод аудит хяналт, шинжилгээ, үнэлгээний газрын дарга Б.Батцэцэг, Эдийн засгийн хөгжлийн яамны Хөгжлийн бодлого, стратеги төлөвлөлт, зохицуулалтын газрын дарга Д.Болдбаатар нарыг тус тус томилсон байна. Мөн Ч.Сайнбилэг, М.Дөш нарыг хараат бус гишүүдээр тус тус томилсон байна.