УИХ-ын чуулганы
баасан гаригийн нэгдсэн хуралдаан 15.45 цагт арайхийж нэг юм эхэллээ. Хуралдаан
даргалагч чуулганы нэгдсэн хуралдаан Засгийн газрын цагаар эхэлж байгаа тул нэн
тэргүүнд сайд нар ирэх ёстойг
сануулсан юм. Ингэснээр Засгийн газрын хэрэг эрхлэх газрын дарга Ч.Хүрэлбаатар,
Сангийн сайд С.Баярцогт, Ерөнхий сайдын
ахлах зөвлөх Б.Долгор, Хүнс хөдөө аж ахуй, хөнгөн үйлдвэрийн дэд
сайд Д.Золжаргал нар хүрэлцэн
ирснээр чуулганы нэгдсэн
хуралдааныг эхлүүллээ. Хуралдаанд Ерөнхий сайд С.Батболд Бизнесийн шинэтгэлийн хүрээнд 2010
онд Засгийн газраас ямар ажлууд хийсэн талаар мэдээлэл хийлээ.
Гүйцэтгэх
засаглалын тэргүүний хэлснээр Монгол Улсын дотоодын нийт бүтээгдэхүүний
70 орчим хувийг 40 мянга орчим хувийн хэвшлийн аж ахуйн нэгж үйлдвэрлэж, тэдгээрт 800 мянга гаруй хүн ажиллаж байгаа аж. Улс орны
эдийн засгийн ачааг үүрч яваа бизнес эрхлэгчдийнхээ ажиллах
орчинг сайжруулах, өрсөлдөх чадвартай болгох, эдийн засгийн өсөлтийг нэмэгдүүлэх,
ард иргэдийн амьжиргааг
сайжруулах, төрийн
байгууллагын хүнд суртлыг халах, шат дамжлагыг
багасгах, хууль эрх зүйн
орчноо сайжруулах хүрээнд бизнесийн орчноо шинэтгэхийг зорьжээ.
Дэлхийн эдийн засгийн форумаас гаргадаг “Дэлхий дахины өрсөлдөх чадварын индекс”, Дэлхийн банкны “Бизнес
эрхлэх нь” тайлангуудад манай орон дэд бүтэц, макро эдийн засгийн тогтвортой
байдал, санхүүгийн зах зээлийн боловсронгуй байдал,
бизнесийн боловсронгуй байдал, бизнес эрхлүүлэх, тусгай зөвшөөрөл, лиценз, зээл авах, гэрээний хэрэгжилт,
компанийг татан буулгах зэрэг үзүүлэлтүүдээр доогуурт бичигддэг байна. Засгийн газар дээрх үзүүлэлтийг сайжруулах зорилгоор 2010 оныг “Бизнесийн орчны шинэтгэлийн
жил” болгон зарлаж, жилийн ажлын төлөвлөгөөнд яам, агентлаг, Монголын үндэсний худалдаа, аж үйлдвэрийн танхим, Монголын ажил олгогч
эздийн нэгдсэн холбоо зэрэг байгууллагын саналуудыг тусган авч ажиллажээ. Нийт 131 зорилт, арга
хэмжээг авч хэрэгжүүлэхээр
зорьсон байна. Үүнээс 105 нь
бизнес эрхлэх орчинг сайжруулахад чиглэжээ. Чуулганы нэгдсэн хуралдаанд Засгийн газрын сайд нараас гадна Үндэсний хөгжил
шинэтгэлийн хороо, Санхүүгийн зохицуулах хороо, Гаалийн ерөнхий газрын
удирдлагууд оролцож, гишүүдийн асуултад хариулт өгч эхэллээ.
Г.Дарь
