Ашигт малтмалын газрын дарга асан Д.Батхуяг нарын дөрвөн хүнд холбогдох хэргийг ирэх даваа гаригт буюу энэ сарын 28-нд Баянгол дүүргийн шүүхэд дэнслэнэ.  АМГ-ын дарга асан Д.Батхуяг, АМГ-ын Геологи, уул уурхайн кадастрын газрын дарга Т.Даваацогт, “Зэлэм” компанийн захирал н.Жаргалсайхан, н.Бар-Ирээдүй нарыг мөрдөн байцаалтын явцад хууль бус лицензтэй холбоотой авлигын хэрэгт буруутгаад байгаа юм. Тодруулбал, Авлигатай тэмцэх газрын мөрдөн байцаалтын явцад Д.Батхуягийг Үндэсний аюулгүй байдлын зөвлөлөөс гаргасан ашигт малтмалын хайгуулын лиценз олголтод хязгаарлалт хийх шийдвэрийг зөрчиж, АМГ-ын даргаар ажиллаж байхдаа эрх мэдлээ хэтрүүлэн ашиглаж, 120 орчим лицензийн зөвшөөрлийг хууль бусаар бусдад олгосон болохыг тогтоогоод байгаа.  Мөн ашиглалтын эрхийн хугацаа нь дуусч, АМГ-ын байцаагчид цуцлах дүгнэлт гаргасан “Саусгоби Сэндс” компанийн хайгуулын таван лицензийн дөрвийнх нь эрхийг сэргээж, нэг лицензийг АМГ-ын Геологи, уул уурхайн кадастрын газрын дарга н.Даваацогтоор дүгнэлт гаргуулж, өөрийн найз, “Зэлэм” компанийн захирал н.Жаргалсайхан гэгчид шилжүүлсэн байж магадгүй юм. 

Тэднийг шүүх хурал энэ сарын 14-нд болох байсан ч Д.Батхуягийн өмгөөлөгч өвчтэй, Т.Даваацогтын өмгөөлөгч Дархан-Уул аймагт шүүх хуралдаанд оролцож байгаа гэх шалтгаанаар ийнхүү хойшилсон билээ.