Тун удахгүй гэгээн хайрын баяр буюу Валентины баяр айсуй.  Жил ирэх тутам өргөн дэлгэр тэмдэглэдэг болоод буй Валентины баярын тоглолтууд хэдийнэ товоо зарлаад эхэллээ.

Өнгөрсөн онд удтал хүлээлгэсэн анхны бие даасан “Picnic” цомгоо өлгийдөн авсан дуучин Г.Тэнүүн “Romantic night” амьд, ковер тоглолтоо гэгээн хайрын өдөр буюу ирэх хоёрдугаар сарын 14-нд хийхээр товоо дуулгалаа. “iloft function house”-д болох түүний тоглолтыг жүжигчин, хөтлөгч Анхаа болон “TV cocktail” хамтлагийн залуус хөтлөх юм байна шүү, залуус аа.

Мөн дуучин Г.Тэнүүний амьд хөгжмийн хамтлаг болон түүний вокалистаар “Universe best songs”-ын наадмын шилдэг оролцогч Урнаа, Энгүүн, Sound of kiss-ын Номин дуулах нь ээ. Г.Тэнүүний хайрын баяраар хийх ковер тоглолтын тайзнаа түүний хамт “Татар” хамтлаг залуусыг доргиох бол, жааз дуучин Б.Солонго жааз хэмнэлд уяраан, “Камертон-2” шоуны шилдэг оролцогчид болсон Б.Оргил, Б.Замбалгарав шинэ эрч хүчийг мэдрүүлнэ гээд тоглолт тэр чигээрээ гэнэтийн бэлгээр дүүрэх байх нь.

Мөн “Романтик үдэш”-т тэр бүр тайзнаа гараад байдаггүй ховор эрхмүүд саатах гэнэ. Тэдгээр хүндтэй зочид бол “Харанга” хамтлагийн дуучин Х.Лхагвасүрэн, дуучин Бат-Оргил нар байна гэсэн шүү. Тоглолтын тасалбарыг ирэх хооёрдугаар сарын 6-наас эхлэн “iloft function house”-аар худалдаалах бөгөөд үнэ нь 20 мянган төгрөг юм байна.

Хайрын баяраар эгшиглэх тоглолтын тов ар араасаа урсах нь ээ.