шинэ Засгийн газар бүрэлдээд нэг сар болов уу үгүй юу нэгэн сайд нь
хэдэн сая сонгогчдоо доромжилсон мэдэгдэл хийж шуугиан тарилаа.
Сангийн
сайд Таро Асо “Хөгшин, настай хүмүүс улс орны төсөв санхүүд ихээхэн
гай болж байна. Хөгшин хүмүүсийг асарч сувилахаа больж, зөнгөөр нь
хурдан үхүүлэх хэрэгтэй. Тэгвэл улс тэдний эмчилгээ, асаргаанд
зарцуулдаг асар их зардлыг хэмнэнэ” хэмээн ярьжээ. Тэрээр Үндэсний
зөвлөлийн чуулганы үеэр нийгмийн даатгалын асуудал хэлэлцэж байхад
дээрх мэдэгдлийг хийсэн аж.
“Тэр хүн үхэхийг хүсч байхад түүнийг
үхүүлэхгүй амьдруулаад байгааг бурхан хүсэхгүй байх. Миний бүх асаргаа
сувилгааг Засгийн газар төлж байгааг өглөө бүр сэрэхдээ мэдвэл надад
лав харамсалтай санагдах болно” хэмээн 2008-2009 онд Японы Засгийн
газрыг удирдаж байсан Т.Асо ярьсан байна. Зарим хэвлэл Сангийн сайдын
эрээгүй мэдэгдлийг эрт дээр үед японууд эцэг эхээ хөгшрөхөөр нь үүрч
ууланд аваачаад амьдаар нь нөгөө ертөнцөд үддэг байсан уламжлалтай
зүйрлэн бичиж байна.
Японы хүн амын дунд хөгшрөлт улам нэмэгдэж,
тэр хэрээр улсаас тэдэнд зарцуулах мөнгө, төсөв өссөөр байгаа нь үнэн
ажээ. Эдүгээ тус улсын 125 сая иргэний 25 хувь нь 60-аас дээш насны
хүмүүс байна. 50 жилийн дараа энэ үзүүлэлт 40 хувьд хүрэх төлөвтэй
байна.
Сангийн сайдын хажуугаар дэд Ерөнхий сайдын албан
тушаалтай 72 настай Таро Асо ямар ч найдваргүй үедээ орсон
хөгшчүүдийн арчилгаа сувилгааг нь зогсоох ёстой хэмээн үзэж байгаа
аж.
“Ийм арчилгаа, эмчилгээ надад лав хэрэггүй. Намайг хөгширч
насгүй болохын цагт зөвхөн амьсгалуулахын тулд эмчилгээ сувилгаа
хийлгэх хэрэггүй гэдгийг би гэр бүлийнхэндээ захисан” хэмээн тэрээр
өгүүлэв.
Хөгшин хүмүүсийн асаргаа Японы нийгмийн халамжийн нэг
“чухал” сэдэв болсоор иржээ. Саяхан гаргасан судалгаагаар, арван
япон айл тутмын дөрөв нь 65-аас дээш насны нэг гишүүндээ улсаас
тусламж тэтгэмж авдаг нь харагджээ. Үүний зэрэгцээ, гэртээ
ганцаараа амьдардаг хөгшчүүдийн үхэл нэмэгдсээр байгаа нь бас нэг
томоохон уриа дуудлага болж байгаа юм. 2010 оны байдлаар, Японд 4.6
сая тэтгэврийн хөгшин гэртээ ганцаараа амьдарч байгаа дүн гарчээ.
Шинэ Засгийн газар ирэх дөрөвдүгээр сард батлах төсөв дээрээ нийгмийн
халамжийн зардлыг бууруулах санаатай байна.
Эх сурвөлж: "ЗУУНЫ МЭДЭЭ" сонин