Ерөнхий сайд ээлжит томилгоогоо хийжээ. Энэ удаад Содномын Чинзоригийг Нийгмийн бодлогын зөвлөхөөрөө томилсон байна. С.Чинзориг нь  1964 онд Өвөрхангай аймгийн Хужирт суманд төрсөн. Эхнэр, 4 хүүхдийн хамт амьдардаг аж. Тэрбээр 1982 онд Хужирт сумын 10-н жилийн дунд сургууль, 1986 онд МУИС, 2005 онд “Отгонтэнгэр” Их сургууль төгссөн.

Төлөвлөгч эдийн засагч, бизнесийн удирдлага, эрх зүйч мэргэжилтэй, Тайвань, Швед, Японд мэргэжил дээшлүүлсэн юм байна.

Түүнчлэн 1986-2000 онд Өвөрхангай аймгийн захиргаанд мэргэжилтэн, хэлтсийн дарга, ИТХ-ын даргаар, 2000-2008 онд Нийгмийн хамгаалал, хөдөлмөрийн дэд сайд, 2009 оноос Монгол Улсын Ерөнхийлөгчийн Тамгын газрын дэд дарга зэрэг албыг хашиж байв гэж Засгийн газрын хэвлэл мэдээллийн албанаас мэдээлэв.