“Монгол тулгатны 100 эрхэм” гэдэг анхаарал татсан нэвтрүүлэг байх. Ямартаа л “Оролцогч нь уйлаад байх юм бол “Монгол тулгатны 100 эрхэм”, хөтлөгч нь уйлаад байх юм бол Одноогийн ток шоу, хэн ч уйлахгүй бол Нандиагийн шоу” гэсэн яриа гарсан байх вэ? Нэвтрүүлэг нь анхаарал татдагийн хэрээр “Монгол тулгатны 100 эрхэм”-ийн хөтлөгч Анужин ч бас янз бүрийн ярианд өртөх. Нэг хэсэг түүнийг жүжигчин Ундралын нөхөр, “Херо энтертаймент”-ын захирал Баатартай учир ургуулсан гэж яригдсан. Жүжигчин Ундрал гэнэт Америкт амьдрахаар явсан нь ч энэ яриаг өдөөсөн гэж хэлж болох. Тэгвэл Анужин өөрөө үүнийг үгүйсгэж, “Надад хүний босгосон амьдрал, мөн миний амьдралт ч асар их үнэ цэнтэй. Бид хоёр хамт амьдраад хаа хаанаа гэр бүл, үр хүүхдээ өнчрүүлсэн явдал ер байхгүй. Бүхий л зүйл байр байрандаа байна” гэж "Гранд" сэтгүүлд өгсөн ярилцлагадаа өгүүлжээ. Мөн түүнийг УИХ-ын гишүүн асан О.Будын охин гэдэг. Үүнийгээ ч хаана нуудаггүй, төрүүлсэн, өсгөсөн хоёр сайхан аавтайдаа баярлаж явдаг гэж чин сэтгэлээсээ ярьсан байх юм. Тэрээр хоёр хөөрхөн охинтой, нөхөр Д.Эрдэнэбат нь бизнесмэн. Түүний ярилцлаганы “Маш өндөрт нисч байгаад үхэж, хэн ч тоохооргүй болж гоо үзэсгэлэнгээ алдаж үзсэн болохоор би амьдралд хайртай” гэсэн гарчиг анхаарал татам. Мэдээж хэрэг бүсгүй хүн хойно өвчин зовлонгийнхоо талаар нарийн дэлгэрэнгүй ярьсангүй. 17-хон насандаа хүнд өвчин тусч бүтэн жил эмнэлэгт шаналж байхдаа охиноо алдчих вий гэж шаналж байгаа ээж аавынхаа өмнөөс хорвоогоос түрүүлж явж болохгүй, сайн сайхан амьдрах ёстой гэсэн хариуцлагыг ойлгож авсан гэж ярьсан нь энэ бүсгүй ийм амжилттай дайчин бас гоо үзэсгэлэнтэй яваагийнх нь нууц болов уу гэж бодогдом.

Зарим хүн Анужинг заримдаа хэтэрхий гэнэн асуулт тавьдаг гэсэн шүүмжлэл байдаг ч нэвтрүүлэг болгондоо чин сэтгэлээсээ хандаж, эмэгтэй хүний нямбай зангаар ханддаг нь мэдрэгддэг. Зөвхөн Монгол Улсын баатар сансрын нисгэгч Гүррагчаагийн оролцсон нэвтрүүлгийн зургийг ОХУ-д тэр тусмаа сансрын нисгэгчдийн бэлтгэлээ хийж амьдардаг асан Оддын хотхонд очиж авсан байна лээ шүү.