Жил бүр Хятадын Хайнань мужийн Боао хотноо болдог Боаогийн Азийн чуулга уулзалтын товыг Бээжинд болсон хэвлэлийн бага хурал дээр зарласан талаар өчигдөр мэдээлсэн билээ. “Азийн Давос” хэмээн нэрлэж Азийн улс гүрнүүдийн төлөөлөгчид цугларан эдийн засаг, бүс нутггийн асуудлаа хэлэлцдэг уг чуулга уулзалтыг энэ сарын 14-16-нд хийхээр болж бэлтгэл ажлыг бараг бүрэн хийж дуусгасан байна. Энэ уулзалтад Монгол Улсын төлөөлөгчид жил бүр оролцдог уламжлалтай.

Хятадын Синьхуа агентлагийн эх сурвалжийн мэдээлснээр БНХАУ-ын дарга Ху Жиньтао ВRIС-ийн орнуудын удирдагчдын гуравдугаар уулзалтад оролцсоныхоо дараа ОХУ-ын Ерөнхийлөгч Дмитрий Медведев нарын зэрэг гадаадын долоон орны удирдагчдын хамт чуулга уулзалтын нээлтийн ажиллагаанд оролцохоор болжээ.

Одоогийн байдлаар 40 гаруй улс орон, бүс нутгийн 1400 гаруй төлөөлөгч чуулгад оролцохоо илэрхийлээд буй аж. Үүнээс Азийн орнуудын Засгийн газрын 300 гаруй төлөөлөгч, бие даасан аж ахуйн нэгжийн 1100 шахам төлөөлөгч Боаогийн чууланд оролцохоо илэрхийлжээ.