НҮБ-ын Олон улсын хөдөлмөрийн байгууллага (International Labour Organization, ILO)-аас жилийн ээлжит тайлангаа танилцуулжээ. Тайланд дурдсанаар дэлхийн хэмжээнд энэ онд ажилгүйчүүдийн тоо 200 сая давах бөгөөд өмнөх зургаан жилийн туршид анхааруулж байсан зүйлсийг дахин дэлхий нийтийн сонорт хүргэсэн байна.
 
Олон улсын хөдөлмөрийн байгууллагын шинжээчдийн урьдчилсан дүгнэлтээр 2013 онд ажилгүйчүүдийн тоо 5,1 саяар нэмэгдэж, 202 саяд хүрэх ба 2014 онд дахин гурван саяар нэмэгдэх гэнэ. Харин өнгөрсөн 2012 онд өмнөх жилтэй харьцуулахад ажилгүйчүүдийн тоо 4,2 саяар өсч, 197 саяд хүрчээ. Хэрэв ОУХБ-ын дээрх таамаглал бодитоор биелбэл ажилгүйдлийн төвшин дэлхийн түүхэнд рекорд тогтоох гэнэ.

Дэлхийн хэмжээнд ийнхүү ажилгүйдлийн төвшин нэмэгдэж буй нь дэлхийн эдийн засгийн өсөлтийн удаашрал, уналттай холбоотой гэдгийг шинжээчид тайлбарлаж байна. Ялангуяа хөгжиж буй орнуудад ажилгүйдлийн төвшин өндөр байгаа аж. Түүнчлэн нийт ажилгүйчүүдийн дунд урт хугацаанд ажил эрхлэхгүй байх нь нийтлэг үзэгдэл гэнэ.