Бразилийн өмнөд зүгт орших Мату-Гросу-ду-Сул мужийн Кампу-Гранди хотод dengue буюу халуун хумхаа өвчний дэгдэлт асар их байгаа тухай тус хотын эрүүл мэндийн төвөөс мэдээлжээ. Он гарснаас хойш өдөрт 600 хүнд дээрх өвчний шинж тэмдэг илэрч, эмнэлгийн байгууллагад хандаж буй гэнэ. Халуун хумхаа өвчин нь шумуулаар дамжин халдварладаг бөгөөд сүүлийн үед усархаг бороо ихтэй байгаа нь шумуул үржих бүр ч таатай нөхцөл болж буй гэнэ. Хотын удирдлагууд гудамж талбайд тогтсон усыг цэвэрлэхийн тулд хэдэн зуун хүмүүсийг хөлсөөр ажиллуулах болжээ.

Халуун хумхаа өвчний улмаас улсын хэмжээнд хоёр хүн амиа алдсан тухай Бразилийн Эрүүл мэндийн яамнаас мэдэгдсэн байна.

Кампу-Гранди хотоос гадна Эспириту Санто мужийн Витория хотод мөн халуун хумхаа өвчин дэгдэж, тус хотод он гарсаар 1500 тохиолдол бүртгэгджээ. Тиймээс Бразилийн Эрүүл мэндийн сайд орон нутгийн удирдлагуудад зааварчилгаа өгч, халуун хумхаа өвчнөөс сэргийлэх хөтөлбөр, арга хэмжээг идэвхжүүлэхийг үүрэгдсэн байна.

Бразилийн Мату-Гросу-ду-Сул мужтай хил залгаа орших Парагвайд мөн халуун хумхаа өвчний улмаас он гарсаар найман хүн амиа алдсан бөгөөд халдвар авсан нийт 8500 гаруй тохиолдол бүртгэгджээ.