Ардчилсан намын Үндэсний зөвлөлдөх хороонд УИХ-ын дарга З.Энхболд нэгэн бяцхан илтгэлийг намынхаа гишүүдэд тавилаа. Энэ илтгэлийнхээ гол санааг илэрхийлэх зургийг тэрбээр хуралд орохынхоо өмнө твиттер хуудсаараа хайж “Олон нийтийн санал бодол гэсэн нэртэй илжиг унасан өвгөн эмгэний зураг твит хийсэн жиргээч дахин жиргэнэ уу, зураг нь хэрэг болоод байна” гэж байж олж авчээ.

Тэрээр намын гишүүддээ хандан “Олон нийтийн санаа бодлыг илэрхийлсэн зургийг та бүхэн харж байна. Бид бүхэн нэг зүйлийг сайн ойлгох хэрэгтэй. Биднийг юу ч хийж бүтээсэн муу хэлдэг хүмүүс бий. Өнгөрсөн удаад бид нийт сонгогчдын 50-иас илүү хувийн саналыг авч гарч ирсэн. Үлдэж буй 40 орчим хувь нь биднийг дэмжээгүй гэсэн үг. Бид үр бүтээлтэй зүйл хийж чадахгүй бол тэдгээр 40 гаруй хувийн эзлэх хувь нэмэгдэнэ. Иймд ажлаа сайн хийцгээе. Хийсэн зүйлээ ойлгуулахдаа ч анхаарья” гэв. З.Энхболдын илтгэл ийм “богино” байсан ч намын даргынхаа “урт” илтгэлээс ч илүүтэй алга ташилтаар шагнуулах нь тэр. Урт богинодоо биш, утга агуулга чухал гэдэг энэ шүү дээ.