УИХ-ын Эмэгтэй гишүүдийн бүлгээс өнөөдөр мэдээлэл хийлээ. Монгол Улсын хүн амын дөрөвний нэг нь тогтмол тамхи татдаг бөгөөд 15-24 насны залуусын дунд тамхины хэрэглээ эрс нэмэгдсэн байна. Судалгаанаас үзэхэд ЕБС-ийн найман хувь нь гэртээ тамхи татдаг, 79 хувь нь дэлгүүрээс тамхи худалдан авч татдаг бол 54.4 хувь нь сурагчдын дэргэд гэрийн бусад гишүүд тамхи татдаг, 54.5 хувь нь эцэг, эхийн нэг нь эсвэл хоёулаа тамхи татдаг гэжээ. Мөн өсвөр үеийн тамхидалтад тамхины сурталчилгаанууд нөлөөлсөн гэж судлаачид үздэг юм байна.

Өсвөр үе, залуусыг тамхинд орохоос сэргийлэх, дам тамхидалтад өртөх боломжийг хаах, насанд хүрээгүй иргэнд тамхи худалдах явдлыг зогсоох шаардлагатай хэмээн УИХ-аас “Тамхины хяналтын тухай” хуульд нэмэлт өөрчлөлт оруулан, 2013 оны гуравдугаар сарын 1-нээс дагаж мөрдөхөөр болсон билээ. Хатуухан заалттай гэх Тамхины хяналтын хууль хэрэгжиж эхлээгүй байгаа ч хуулийг сурталчлах үүднээс тамхины хор хөнөөлийг өсвөр үеийнхэнд тайлбарлан таниулах зорилгоор УИХ-ын эмэгтэй гишүүдийн бүлэг, Сурагчдын холбоотой хамтран “Тамхинаас татгалзсан өсвөр үе” сэдэвт 1000 хүүхдийн чуулганыг маргааш Төрийн ордонд зохион байгуулах гэж байна. Чуулганд нийслэлийн 34 сургуулийн 1000 сурагч оролцох бөгөөд төрий байгууллагын холбогдох мэргэжилтнүүд оролцох аж.