Төрийн банкны гүйцэтгэх за­хир­лаар Монгол хүн томилж бол­доггүй юм уу гэсэн асуултад “Манай захирлууд Европын сэргээн бос­голтын хөгжлийн банк болон Дэл­хийн банкнаас цалинждаг. Утас­ны төлбөрөө ч улсын төсвөөс гаргуул­даггүй. Тэгээд ч  тэд энэ ажилд турш­лагатай учир бидэнд сурах юм их бий” гэж  дарга нараа өмөөрөн да­руухан хариулт өгч байсан залуу өнөөдөр Төрийн банкны гүйцэтгэх захирлын албан тушаалд дэвшжээ.  Түү­нийг Ж.Отгонбилэг гэдэг. Ту­хайн үед  тэрбээр Төрийн банкны Бор­луулалт хариуцсан захирлаар ажил­лаж байсан юм.  Төрийн банк дам­пуурах гэж байна гэсэн мэдээллийг няцааж, захирлаа төлөөлөн мэдээлэл хийж байсан тэрбээр Төрийн банкны гүйцэтгэх захирлын суудалд суух ёстой анхны Монгол хүн байж. Ийнхүү Төрийн банкны удирдлагын суу­далд Бэн Турнбуль, Роберт Ложе нар тухалсны эцэст гурав дахь захирлаар нь Монгол хүн томил­лоо. Санхүүгийн салбарынхан Ж.От­гон­билэгийг Монголбанкны дэд ерөнхийлөгч Н.Золжаргалын шавь, эзэмш­сэн мэргэжилдээ чадвартай за­луу гэлцэж, багагүй итгэл хүлээл­гэдэг юм билээ. Үнэхээр ч эзэмшсэн мэр­гэжилдээ үнэнч, чадвартай гэдэг нь түүний албан тушаалын томилгооноос тодхон харагдаж байгаа юм. Тэрбээр Япон улсад мастер хамгаалсан учир тэдний ажилч, хичээнгүй занг өвлөсөн нь лавтай. Ж.Отгонбилэг 1997 онд  Монголбанкинд хянан шалгагчаар ажилд орж, хоёр жилийн дараа тушаал дэвшин  ахлах хянан шалгагч болж байсан нэгэн.  Харин 2006 оноос Санхүү эдийн засгийн дээд сургуульд багшилж байгаад  нэг жилийн дараа Монгол шуудан банкны зээлийн бодлого зохицуулалтын захиралаар томилогдож байсан байна.

Зохиогчийн эрх:
"Улс төрийн тойм" сонин