Данийн “Bang & Olufsen” компани ирэх 18 сарын хугацаанд нэрийн барааны 125 дэлгүүрээ хаахаар болжээ. Энэ нь тус компанийн санхүүгийн жилийн хоёрдугаар улирлын цэвэр ашиг 47 хувиар буурсантай холбоотой юм байна. Компанийн цэвэр ашиг өнгөрсөн оны есөөс арваннэгдүгээр сарын хооронд 15,4 сая крон /2.06 сая евро/  байсан нь  өнгөрсөн жилийн мөн үед 28.8 сая кроны цэвэр ашигтай ажилласантай харьцуулахад огцом буурсан үзүүлэлт аж. 

“Bang & Olufsen” компани нийт 637 нэрийн дэлгүүртэй бөгөөд стратегийн төлөвлөгөөний дагуу  голдуу Европын орнууд дахь нэрийн дэлгүүрүүдийнхээ үйл ажиллагааг зогсоохоор болсон байна. Гэхдээ компанийн зүгээс дээрх шийдвэрийг жижиглэн худалдааны чанарыг сайжруулахтай холбон тайлбарлажээ.

“Bang & Olufsen” компани 1925 онд үүсгэн байгуулагдсан бөгөөд тансаг дээд зэрэглэлийн харах, үзэх, сонсох чиглэлийн бүтээгдэхүүн үйлдвэрлэдгээрээ дэлхийд алдартай юм. Тус компани хамгийн сүүлд “BeoVision 11” нэртэй зурагт үйлдвэрлэсэн нь компанийн орлогыг таван хувиар нэмэгдүүлжээ.