Хүний хөгжил сангаас хөгшид болоод хөгжлийн бэрхшээлтэй хүмүүст олгох 340 мянган төгрөгийг олгоод бараг дуусч байгаа хэмээн нэгэн эрх мэдэлтэн их л ам бардам өгүүлж байхыг зурагтаар харлаа. Нэг хэсэг хүмүүсийн амыг хаасандаа сэтгэл хангалуун байгаа бололтой, тэр эрхэм. Аль хэзээний өгөх байснаа цагаан сарын өмнө “галын хор” болгон илгээсэн 340 мянган төгрөг Эрээний зах зээл рүү одох нь ойлгомжтой. Харин бусад нь яах вэ? Бусад гэдэг маань хөдөлмөрлөх насныхан шүү дээ. Хөгшид хөөрхий, хөгжлийн бэрхшээлтэй хүмүүс хөөрхий, оюутнууд ч болохгүй байна гэсээр  шоовдорлон үлдээдэг хэсэг нь залуус, ид дунд насныхан болоод байна. Бид бие даан амьдрах гэж хичээн зүтгэж байгаа нь буруутай мэт сэтгэгдэл төрөх боллоо. Ядаж байхад хагас жилийн өмнөөс   олгож эхэлнэ гэж өндөр дуугаар зарласан хувьцааны сураг ажиг ч алга. Монгол Улсаараа овоглосон иргэн бүрт хаягласан 536 ширхэг хувьцаа хаана явна аа?

Өмнөговь аймгийн Цогт­цэций сумын нутагт байрлах Тавантолгойн нүүрсний ордыг 300 жил ашиглах нөөцтэй гэж бидэнд итгүүлсэн. Гэтэл тус ордын нүүрсийг өдөржин шөнөжин урагш зөөж, хүнд даацын тэрэгний мөрөөр уул нь тал, тал нь там болж байгаа сурагтай. Тэнд хүмүүс хоногийн 24 цаг амрах сөхөөгүй ажиллаж байгаа юм чинь бидэнд ирэх хувьцаа наашилж л байгаа хэрэг гэж уужуухан бодсоор хагас жилийг үджээ. Харин хувьцаа сураггүй хэвээр төдийгүй харин ч Тавантолгойнхон нүүрсээ ч зөөх зардалгүй хэцүүдэж эхэлсэн гэх юм. Хэдэн үеэрээ толгой өвдөхөөргүй “зооглох” хувьцааны их ашиг хаачив аа. Ойр дотны аав ээж, ахан дүүстээ бид чинь хууртвал бид голдоо ортол гомдож, ямархан аашилдаг билээ. Гэтэл төр засаг гэгч барих барьцгүй, хүлээх хариуцлага ч үгүй оргүй хоосонд итгэсээр байна биш үү. Тэр баруун зүүн Цанхи, барууны дотоодын хөрөнгө оруулалт бидэнд хамаа алга. Тэр бүгдэд төр нь толгой гашилгах биз. Гагцхүү хувьцаагаа л авмаар байна. Хувьцаа хаана явна, дарга нар аа?