Сирийн Халеб хотын их сургуульд дараалсан дэлбэрэлт болж, 80 гаруй хүн амь үрэгдэж, олон хүн гэмтэж, шархатсан байна. Дэлбэрэлт Халебын их сургуулийн архитектурын факультет болон хотын оршин суугчдын түр орогнож байсан танхимын хооронд болжээ. Дэлбэрэлтийн улмаас 83 хүн амь үрэгдэж, 150 гаруй гэмтэж бэртсэн тухай Сири дэх хүний эрхийн байгууллагаас мэдээлсэн байна. Дэлбэрэлт болсон өдөр оюутнууд шалгалттай байсан тул амь үрэгдсэн хохирогчдын дийлэнх нь оюутнууд, цөөн тооны жирийн иргэд байжээ. Тэд Сирийн Засгийн газар болоод босогчдын хоорондох ширүүн тулааны улмаас орон гэргүй болж, их сургуулийн байранд түр байрлаж байсан хотын оршин суугчид аж.

Дэлбэрэлтийн улмаас Халебын их сургуулийн барилгын фасад бүхэлдээ шахам эмтрэн унаж, гаднах зогсоолд байсан автомашинууд дэлбэрэлтэд өртөн шатсан байна.

Сирийн үндэсний телевиз дараалсан дэлбэрэлтэд террористуудыг буруутган, их сургууль руу пуужин харвасан гэж мэдээлсэн бол босогчид Засгийн газрын байлдааны онгоцноос пуужин харвасан гэж мэдэгдсэн байна.  Харин цэргийнхэн дээрх хэргийг босогчдын харвасан газар-агаар ангиллын пуужин их сургуулийн барилгыг оносон гэж тайлбарлажээ.

Сирид үүсээд буй эмх замбараагүй байдал энгийн иргэдийн амь насыг хохироож, бараг хоёр жил үргэлжилж буй мөргөлдөөний улмаас амь үрэгдэгсдийн тоо 60 мянга хол даваад байна.