Японы зүүн хэсгийн нутгуудаар цасан шуурга шуурч, их хэмжээний цас орсноос нийслэл Токио хот болон ойр орчмын мужуудад авто замын хөдөлгөөний ачаалал нэмэгдэж, түгжрэл үүсчээ. Японы цаг уурын агентлагаас ойрын өдрүүдэд Фукушима мужид хүчтэй цасан шуурга шуурч, Ямагата, Мияги, Нагано, Яманаси, Канагава зэрэг мужид их хэмжээний цас орох урьдчилсан төлөв мэдэгдсэн тухай анхааруулсан байна.

Их хэмжээний цас, шуурганы улмаас Сэндай хот болон Токиогийн “Ханэда” нисэх буудлын үйл ажиллагааг түр хугацаанд зогсоож, 400 гаруй нислэгийг цуцалжээ.  Түүнчлэн осол аваараас сэргийлэх үүднээс хурдны гол замууд болон трамвайн шугамуудыг хаажээ. “NHK” телевизийн мэдээлснээр их хэмжээний цасны улмаас Токиогийн Чиёда дүүрэгт автын осол гарч, зургаан хүн амь үрэгдсэн байна. Өчигдрийн байдлаар цасны зузаан 10 см байсан бөгөөд цаашид 30 см-т хүрэх төлөвтэй байгаа гэнэ.