Цагаан сар дөхөж байгаатай холбогдуулан Үйлдвэр, хөдөө аж ахуйн яамнаас “Монголд үйлдвэрлэв-Цагаан сар” үзэсгэлэн худалдаа зохион байгуулах гэж байгаа талаараа өнөөдөр хэвлэлийн хурал хийлээ. Манайхан Цагаан сар дөхөхөөр гарын бэлэг нэрээр асар их мөнгөөр гадны орноос тухайлбал, өмнөд хөршөөс бараа оруулж ирдэг. Тиймээс энэ их мөнгөний урсгалыг дотоодынхоо үйлдвэрлэгчдэд чиглүүлэх зорилгоор уг үзэсгэлэнг энэ жил долоо дахь жилдээ зохион байгуулахаар болжээ. Өмнө нь зөвхөн “Мишээл экспо” төвд болдог байсан үзэсгэлэн энэ жил АСА циркийн байранд мөн болно.

Долоо дахь удаагийн үзэсгэлэн худалдаанд хямд үнэтэй, бэлгэнд өгөхөд тохиромжтой бараа бүтээгдэхүүн үйлдвэрлэдэг албан байгууллага, хувь хүмүүсийг түлхүү оролцуулахаар болжээ. Харин лангууны түрээсийн үнийг Засгийн газраас дээрх үзэсгэлэн болох байгууллагуудтай тохиролцон 15-20 хувиар бууруулж, бууруулсан төлбөрийн 50 хувийг Засгийн газар төлөхөөр зохицуулалт хийх гэнэ. “Монголд үйлдвэрлэв-Цагаан сар” үзэсгэлэн өмнө нь тав хоногийн хугацаанд болдог байсан бол энэ удаад 14-21 хоногийн хугацаатай явуулахаар төлөвлөжээ. Үзэсгэлэн худалдаа энэ сарын 17-оос Мишээл экспо болон АСА циркийн байранд болох юм.