1990 оны дөрөвдүгээр сарын 7-ны энэ өдөр ардчилсан нам анх байгуулагдаж байсан түүхтэй. Ойн баярын өдрөө тохиолдуулан өнөөдөр Дархан-Уул аймгийн ардчилсан намынхаа дэргэд сургалт, судалгааны төвийг шинээр байгуулж, үйл ажиллагааг нь эхлүүллээ. Энэ төв нь иргэд болон намын гишүүдийнхээ улс төр, эрх зүйн мэдлэг боловсролыг дээшлүүлэхэд дэмжлэг үзүүлэх, төрөл бүрийн сургалтуудыг зохион байгуулах, орон нутагт тулгамдаж байгаа асуудлыг судалж, намын үүр болгон дээр бодлогын баг байгуулан, иргэдийн санал хүсэлтийг авч намын бодлого шийдвэрт тусгуулах зорилготой.Сургалт судалгааны төв компьютерийн сургалтаар үйл ажиллагаагаа эхлүүлсэн юм. Мэргэжлийн төвүүдийн багш нар удирдан явуулах уг сургалтанд 20 гишүүнээ үнэ төлбөргүй хамруулахаар болж, энэ үеэр эрхийн бичгийг нь гардуулсан. Цаашид хууль, эрх зүйн чиглэлээр, өрхийн аж ахуйг хэрхэн хөгжүүлэх, төсөл хэрхэн бичих вэ гээд шат дараатай олон төрлийн сургалтыг зохион байгуулахаар төлөвлөжээ.
Ардчилсан намын баяраар арван бяцхан иргэн хорвоод мэндэлжээ
Монголын ард түмэнд эрх чөлөөг мэдрүүлж, ардчилалын салхи бүлээнээр үлээж эхлээд нэгэнтээ 21 жилийг ардаа орхилоо. Ардчилсан үндсэн хуулиа баталж, ардчилсан анхны ерөнхийлөгчийг сонгосон гээд ардчилалын алхамууд түүх болон үлдсээр байна. Тэр үед төрж байсан хүүхдүүд өнөөдөр 21 настай. Эх орныхоо хөгжил цэцэглэлтэнд ид гар бие оролцох насан дээрээ ирчихээд байна. Харин өнөөдөр баярын өдрөөр энэ хорвоод мэндэлж, ээж аавыгаа баярлуулсан бяцхан иргэдэд аймгийн ардчилсан намынхан гарын бэлэг гардуулсан юм.Өмнө нь амаржих тасагт сургалтын танхимыг тохижуулж өгч байсан тухайгаа энэ үеэр хэлж байсан. Түүнчлэн жил бүр уламжлал болсон энэхүү үйл ажиллагааг цаашид ч зохион байгуулж, ардчилалын баяраар хүүхдээ төрүүлсэн эхчүүдэд хүндэтгэл үзүүлнэ гэлээ.
Ардчилсан нам байгуулагдсан түүхт энэ өдөр арван бяцхан иргэнээр бүл нэмсэний тав нь энхийн манаанд зогсох хүү бол тав нь ирээдүйд ээж болж, бүүвэйн дуу аялах охин байлаа. Мөн ихэр охид ч энэ өдөр хорвоод мэндэлсэн байсан. Жилийн өмнөх энэ өдөр найман шинэ иргэн төрсөн байсан бол энэ удаад ихрээр нэмэгдсэн таатай үйл явдал болжээ. Эрх чөлөө, ардчилалыг авчирсан энэ өдөр ээж, аавыгаа баярлуулж, эх орондоо ирсэн бяцхан үрсийн цаашдын амьдралд нь аз жаргал сайн, сайхан бүхнийг хүсэн ерөөе.
