УИХ-ын Төрийн байгуулалтын байнгын хорооны өнөөдрийн хуралдаанаар Төрийн албаны зөвлөлийн дарга Д.Зүмбэрэллхамыг өөрийнх нь гаргасан хүсэлтийн дагуу ажлаас нь чөлөөлөхийг дэмжсэн бол оронд нь Б.Цогоог томилуулах асуудлыг үргэлжлүүлэн хэлэлцэхээр болсон ч хойшлогдлоо. Учир нь О.Баасанхүү гишүүн “Төрийн албаны зөвлөлийн даргад нэр дэвшсэн Б.Цогоо нь төрийн албан хаагч мөн үү, биш үү” гэдгийг тодруулах шаардлага байна. Тиймээс асуудлыг хойшлуулах шаардлагатай байна гэснийг гишүүд санал нэгтэй дэмжив.

Төрийн албаны зөвлөлийн даргаар Б.Цогоог томилуулах хүсэлтийг Монгол Улсын Ерөнхийлөгчийн зүгээс гаргасан юм. Б.Цогоо нь инженер-эдийн засагч мэргэжилтэй. 1981-1995 онд Шинжлэх ухаан, техникийн улсын хороонд мэргэжилтэн, референт, секторын эрхлэгч, орлогч захирал, 1995-2004 онд ОХУ-ын Москва хот дахь Шинжлэх ухаан техникийн олон улсын төвд Монгол Улсын төлөөлөгч, 2004 онд Зам тээвэр, аялал жуулчлалын яамны Газрын дарга, 2004-2005 онд МИАТ ХК-ийн гүйцэтгэх захирал, 2005-2009 онд “Крафт интернэйшнл” ХХК-ийн захирал, 2009 оноос өнөөг хүртэл Монгол Улсын Ерөнхийлөгчийн Тамгын газар, Шинжлэх ухааны академийн харьяа Үндэсний хөгжлийн хүрээлэнгийн захирлаар ажиллаж байна.