Нэт акулууд Францын эсрэг зарга үүсгэв | News.MN

Нэт акулууд Францын эсрэг зарга үүсгэв

Хуучирсан мэдээ: 2011.04.07-нд нийтлэгдсэн

Нэт акулууд Францын эсрэг зарга үүсгэв

Франц улсын засгийн газрын эсрэг Google, Facebook зэрэг тэргүүтэй интернэт акулууд зарга үүсгэжээ. Учир нь Францын засгийн газар нэг жилийн хугацаанд веб хэрэглэгчдийн хувийн мэдээллийг хянах тухай хуулийг батлахаар төлөвлөж байсан байна. Нийтдээ 20 гаруй веб үйлчилгээ эрхэлдэг компани нэгдэж, зарга гаргасны дотор eBay, Dailymotion зэрэг багтсан ба заргыг Франц улсын Төрийн зөвлөлөөр хэлэлцэх ажээ.

Дээрх хууль хэрэв батлагдвал интернэт худалдааны сайт, видео, хөгжмийн сайт, вебмэйлийн сайтыг ашигладаг хэрэглэгчдийн мэдээллийг төрөөс хянах юм. Хянах мэдээллийн хязгаар нь хэрэглэгчийн бүтэн нэр, шуудангийн хаяг, утасны дугаар болон нууц үг зэргээс хэтрэхгүй байх бөгөөд шаардлагатай үед цагдаа, авлигын эсрэг байгууллага, татвар, нийгмийн хамгааллын газраас хэрэглэгчдийн мэдээлэлд нэвтрэх боломжтой юм. Харин веб үйлчилгээний компаниуд Европын олон орны, олон үндэстэнд чиглэсэн үйл ажиллагаа явуулдаг тул ямар нэг хаалт, хяналт байх нь зохимжгүй. Түүнчлэн хэрэглэгчдийн нууц үгийг авна гэдэг байж болшгүй хэрэг гэж үзсэний үндсэн дээр дээрх заргыг үүсгэжээ. Тэдний гаргасан зарга энэ долоо хоногт шийдэгдэх юм байна.

Б.Энхцэцэг

0 сэтгэгдэл

News.mn сайтад сэтгэгдэл оруулахад анхаарах зүйлс

NewsMN Гар утасны хувилбар Татах
NEWS.mn

Мэдээллийн эх сурвалж