Багийн лидер Дирк Новицки болон гарааны холбон тоглогч Даррен Колинсон нар бэртэж, талбайг чөлөөлснөөр “Даллас Маверикс” багагүй асуудалтай тулгарсан билээ. Тиймээс багийн удирдлагууд чөлөөт агент байсан Дерек Фишертэй өнгөрсөн арваннэгдүгээр сарын 29-нд гэрээ хийж, түүнд итгэл хүлээлгэсэн юм. Гэтэл NBA-ын таван удаагийн аварга, өдгөө 38 настай, ахмад туршлагатай тоглогч харамсалтай нь өчигдөр “Филадельфия-76” багтай хийсэн тоглолтын үеэр гэмтэж, талбайг орхив. Тоглолт эхлээд ердөө тавхан минут өнгөрч байх үед “76” багийн холбон тоглогч Эван Турнер Фишерийн баруун хөл дээр бууснаар Фишерийн шагай гэмтэж, талбайг чөлөөлсөн байна.

Тус тоглолтод “Маверикс” ялалт байгуулсан ч Фишер хэдийд талбайд эргэн гарах нь тодорхойгүй байна. Даллас хотын баг өдгөө 12 хожил, 13 хожигдолтой өрнөд бүсийн 10 дугаар байрт бичигдэж байна.