Энэтхэгийн Дэли хотын Муниркагаас Дварка орох автобусанд өнгөрсөн ням гаригийн шөнө зорчиж явсан залуу хосууд руу бүлэг хүмүүс дайрчээ. Тэд 23 настай сурагч охиныг  автобусанд бүлэглэн хүчиндэж, найз залууг нь зодсон байна. Одоогоор бүсгүйн бие маш муу байгаа бөгөөд тэдэн рүү долоон хүн дайрсан аж. Дэли хотын цагдаа нар энэ хэрэгт холбогдуулан автобусны жолооч тэргүүтэй хэд хэдэн хүнийг баривчлан, мөрдөн шалгах ажиллагааг эхлүүлсэн байна. Энэ хэрэг олон нийтэд ил болсны дараа Дэли хотын иргэд айдаст автаж, охид, эмэгтэйчүүдийг хамгаалахыг шаардан, жагсаал зохион байгуулжээ.

Жагсагчид Засгийн газрыг хүчингийн гэмт хэргийг таслан зогсоож чадахуйц хатуу хууль боловсруулж, энэ гэмт хэргийг таслан зогсоох талаар дорвитой арга хэмжээ авахгүй байна хэмээн буруутгаж, хүчингийн гэмт хэрэг үйлдэгчдэд цаазаар авах ял оноохыг шаардсан байна. Мөн эсэргүүцлийн жагсаалд оролцогчид охид эмэгтэйчүүд гадуур гарахаас айж буйгаа илэрхийлэн тэднийг хамгаалахыг Засгийн газраасаа шаардсан байна. Энэтхэгийн Дэли хотод бусад хотуудыг бодвол хүчингийн хэрэг илүү их гардаг бөгөөд өнгөрсөн онд 572 хүчингийн хэрэг гарсан байна. Харин энэ жил хэргийн тоо 635-т хүрч өсчээ.