ЮНЕСКО-гийн Монголын Үндэсний Комисс ШУТИС-тай хамтран “ Усны хүч 2012” сэдэвт оюутны анхдугаар эрдэм шинжилгээний хурлыг зохион байгуулсан бол өнөөдөр шилдгүүдээ нэрлэжээ.  Энэхүү эрдэм шинжилгээний анхдугаар хурал нь Монгол Улс ЮНЕСКО-д элсэн орсны 50 жилийн ой энэ жил тохиож буйн хүрээнд зохион байгуулагдсан бөгөөд шагнал гардуулах ёслолд ЮНЕСКО-гийн Монголын үндэсний комиссын Ерөнхий нарийн бичгийн Дарга Г. Жаргалсайхан, ШУТИС-ийн Эрдэм шинжилгээ, технологийн Проректор Б. Очирбат, ШУТИС-ийн Оюутны холбооны Тэргүүн Б. Мягмардорж нар оролцсон байна. Уг эрдэм шинжилгээний хурлаар дэлхий нийтийн өмнө тулгамдаад байгаа усны асуудалд оюутан залуусын дуу хоолойг нэгтгэх, энэ чиглэлийн судалгааны ажлыг дэмжих зорилготой байсан ажээ.

 “Усны хүч-2012” эрдэм шинжилгээний хурлын шилдгүүдэд:

1-р байр: ЭМШУИС-ийн оюутан Б. Бямбадорж “Усны био энергийн болон цасны найрлагын судалгаа” сэдвээр,
2-р байр: ШУТИС-ийн Хүнсний Инженер Биотехнологийн сургуулийн хүнсний биотехнологийн ангийн 4-р курсийн оюутан     Б. Лхагвасүрэн “Оюутны дотуур байрны ундны усанд хийсэн эрүүл ахуй, чанарын судалгаа” сэдвээр,
3-р байр: ШУТИС-ийн Дарханы Технологийн Сургуулийн Усан хангамж, ус цэвэрлэгээний инженерийн ангийн 3-р курсийн оюутан М.Роза “Ахуйн Бохир усыг хөрсөөр цэвэрлэх туршилтын судалгаа” сэдвээр,
4-р байр: ШУТИС-ийн ХИБС-ийн хүнсний биотехнологийн ангийн 4-р курсийн оюутан  Н.Цолмонгарав “Оюутны дотуур байрны ундны усанд хийсэн     эрүүл ахуй, чанарын судалгаа” сэдвээр,
Тусгай байр: ШУТИС-ийн Үйлдвэрлэлийн технологи, дизайны сургуулийн оюутан П.Ренчин “Усны зохистой хэрэглээн дэх техникийн дэвшил ба хаягдал, усны дахин ашиглалт” сэдвээр тус тус шалгуулж,  өргөмжлөл, мөнгөн шагналыг гардуулжээ.