Засгийн газрын ээлжит хуралдаанаар өнөөдөр Төрийн өмчийн хорооноос санал болгосон “Эрдэнэс МГЛ” ХХК-ийн давуу эрхийн хувьцаанаас Монгол Улсын иргэн бүрт тус бүр нэг ширхгийг эзэмшүүлэх тухай асуудлыг авч хэлэлцээд дэмжжээ. Гэхдээ эцсийн шийдвэрийг Засгийн газрын хуралдаанаас гаргаагүй, ирэх долоо хоногийн лхагва гаригт үргэлжлүүлэн хэлэлцэхээр болсон байна.

Хэрвээ Засгийн газар эл асуудлыг баталж, тогтоол гаргавал, Монгол Улсын иргэн бүр хоёр төрлийн хувьцаа эзэмших эрхтэй болох юм. Тодруулбал, “Эрдэнэс тавантолгой” компаниас монгол хүн бүр 536 ширхэг хувьцаа эзэмших эрхтэй болсон бол хоёр дахь нь “Эрдэнэс МГЛ” ХХК-ийн давуу эрхийн хувьцаанаас тус бүр нэг  ширхгийг эзэмшинэ. Давуу эрхийн хувьцаанаас Монгол Улсын иргэн бүр жил бүр ногдол ашиг хүртэнэ. Мөн энэхүү давуу эрхийн хувьцаанаас 2011 оны дөрөвдүгээр сарын 1-нээс хойш мэндэлсэн шинэ иргэддээ эзэмшүүлэхээр төсөлд заасан юм байна. Учир нь “Эрдэнэс тавантолгой” компанийн энгийн хувьцааг 2011 оны гуравдугаар сарын 31-нээс өмнө мэндэлсэн Монгол Улсын иргэн бүр эзэмших эрхтэй байхаар Засгийн газрын тогтоол батлагдсан. Тэгвэл шинээр мэндлэх иргэдийн хувьд давуу эрхийн хувьцаа эзэмшинэ хэмээн ойлгож болох аж. Давуу эрхийн хувьцааг Монгол Улсын нийт иргэддээ эзэмшүүлэхтэй холбоотойгоор 3 сая ширхэг давуу эрхийн хувьцаа гаргах гэнэ. Монгол Улсын нийт хүн ам 2.8 сая орчим гэж тооцон, үлдэж байгаа 200 мянган хувьцаа нь шинээр мэндлэх үрсэд хуваарилагдана гэж тооцоолжээ. Жилдээ улсын хэмжээнд 50-60 мянга орчим шинэ иргэн мэндэлдэг тул дээрх 3 сая хувьцаа ойрын дөрвөөс таван жилд хүрэлцэнэ хэмээн үзсэн юм байна.