ОХУ-ын Белоярск хотноо боксын “Дэлхийн цом”-ын тэмцээн үргэлжилж байна. Нефтьтэй орнуудын “Дэлхийн цом” гэгдэх тус тэмцээнд Монголын баг дөрвөн тамирчны бүрэлдэхүүнтэй оролцож буй юм.

Тэмцээн өнгөрөгч пүрэв гаригт эхэлсэн бөгөөд Монголын ширэн бээлийтнүүдээс 49 кг-ын жинд Г.Ган-Эрдэнэ маргааш аваргын алтан медалийн төлөө тоглохоор шалгараад байгаа бол Гавьяат тамирчин Н.Төгсцогт 56 кг-д өнөөдөр мөнгөн медалийн төлөө тулалдахаар болжээ.

Г.Ган-Эрдэнийн хувьд Латви болон ОХУ-ын тамирчдыг ялж, маргааш алтан медалийн төлөө Казахстаны тамирчинтай тоглохоор болсон байна. Харин Лондонгийн олимпиос хойш анхны тэмцээндээ оролцож буй Н.Төгсцогт дөрөвний нэг шигшээд Казахстаны тамирчныг 17:7 харьцаатай ялснаар өнөөдөр хагас шигшээд Азербайжаны боксчинтой нударга зөрүүлэхээр болжээ. Өнөөдрийн учраагаа ялбал маргааш аваргын төлөө тоглох эрхтэй болох юм.

“Дэлхийн цом”-ын рингэнд гарч тулалдсан бусад боксчдын тухайд 60 кг-ын жинд ОУХМ Д.Отгондалай Молдавын тамирчныг ялж, хүрэл медалийн төлөө Армяны боксчинд ялагдсан байна. Харин 64 кг-д эх орноо төлөөлсөн Ц.Отгон-Эрдэнэ эхний тулаандаа Латвийн Артурс Ахметовст 13:8 харьцаатай дийлдсэнээр тэмцээнийг орхижээ.

НЭМЭЛТ 18:10 цагт:

Гавьяат тамирчин Н.Төгсцогт өнөөдөр "Дэлхийн цом"-ын рингэнд ээлжит тулаанаа хийж, Азербайжаны боксчныг ялснаар маргааш аваргын төлөө рингний эзэн орон ОХУ-ын тамирчинтай тулалдахаар боллоо.