Шинжлэх ухааны салбарын 2012 оны “Байгаль, нийгмийн ухаан”-ы шилдэг бүтээлийг шалгаруулж, Засгийн газрын шагнал олгох ёслолын ажиллагаа Төрийн ордны Баганат танхимд  боллоо. Шилдэг бүтээлийг шинжлэх ухааны академийн Физик, технологийн хүрээлэнгийн эрдэм шинжилгээний ажилтан, академич, шинжлэх ухааны гавьяат ажилтан Хавтгайн Намсрайн “Бодисын бүтцийн тулгуур судалгаа ба шинжлэх ухаан, технологийн суурь мэдлэгийн үндсүүд” бүтээлд олгохоор Засгийн газрын тогтоол гарсан юм. Шагналыг 100 сая төгрөг дагалддаг байна.

Ерөнхий сайд Н.Алтанхуягаас шилдэг бүтээлийн батламжаа гардсан академич Х.Намсрай “Төрийнхөө хамгийн дээд шагналыг Ерөнхий сайдаасаа авлаа.  Монголын шинжлэх ухааныг, тулгуур судалгааг үнэлсэн сайхан шагнал хүртсэндээ баяртай байна. Залуучуудыг шинжлэх ухаанд дуудсан гайхамшигтай үйл явдал болж байна. Хүүхэд, залуучуудыгаа шинжлэх ухааны оргил өөд тэмүүлэх жим гаргаж өгч байгаад Засгийн газартаа талархаж байна” гэж хэллээ. Академич Х.Намсрай “Бодисын бүтцийн тулгуур судалгаа ба шинжлэх ухаан, технологийн суурь мэдлэгийн үндсүүд” бүтээлдээ  судалгаа шинжилгээнийхээ 44 жилийг зарцуулжээ.

Шагналаа гардсаны дараа академич Х.Намсрай Төрийн ордны Их танхимд хуран цугласан эрдэмтэн, судлаач, багш, оюутны төлөөлөл болсон 400 гаруй хүнд бүтээлийнхээ гол агуулгын талаар сонирхолтой лекц уншлаа.    

Сүүлийн хэдэн жил Оюутолгой, Тавантолгойн тухай их яриад монгол толгойгоо орхисон нь үнэн. Тухайлбал, шилдэг бүтээлд олгодог энэ шагналыг 4 жилийн өмнө математикч С.Төмөрбат гуай авснаас хойш олгоогүй. Шинэчлэлийн Засгийн газар нэр хүнд бүхий энэ шагналаа жил бүр олгоно, жил бүр шилдэг бүтээл шалгаруулна гэдгээ Ерөнхий сайд лекцийн төгсгөлд хэлээд монгол толгойг дэмжээд өгвөл дэлхийд хэрэгтэй байна гэдгийг олон улсад үнэлээд байхад эх оронд нь үнэлэхгүй орхиж болохгүй гэлээ. Манай судлаач, эрдэмтдэд хүч чадал, ухаан, авьяас байгаа. Энэ бүхнийг Засгийн газар тордож ургуулах, шагнаж урамшуулах, дэмжих бодлого барьж ажиллана гэдгээ Засгийн газрын тэргүүн илэрхийллээ.

Академич Х.Намсрайн “Бодисын тулгуур судалгаа ба шинжлэх ухаан, технологийн суурь мэдлэгийн үндсүүд” бүтээл дэлхийн олон орны ном, сэтгүүлд хэвлэгдэж, эрдэм шинжилгээний ажлын гол ишлэл болж, өндөр үнэлгээ авчээ. Онолын физикийн салбарт Намсрайн онол, Намсрайн дөхөлт, Намсрайн арга, Намсрайн схем, Намсрайн хязгаарлалт гэсэн нэр томъёо гарсан нь манай эрдэмтний бүтээлийг дэлхийн мэргэжил нэгт эрдэмтэн, судлаачид нь хүлээн зөвшөөрч буйн илрэл гэдгийг ШУА-ийнхан хэлж байна гэж Засгийн газрын Хэвлэл мэдээлэл, олон нийттэй харилцах албанаас мэдээллээ.