Монголбанкнаас жижиглэнгийн нефтийн бүтээгдэхүүнийг хамгийн бага зардлаар санхүүжүүлэхийн зэрэгцээ хил дээрх өртгийн ханшаас хамаарах  нөлөөллийг бууруулж,  жижиглэнгийн борлуулалтын үнийг тогтвортой байлгах нөхцлийг бүрдүүлэх зорилгоор SIFS дэд хөтөлбөрийг Уул уурхайн яамтай хамтран 2012.10.26-ны өдрөөс хэрэгжүүлж байгаа билээ. Өнгөрсөн хугацаанд Уул уурхайн яамнаас жижиглэнгийн шатахууны зах зээлийн тооцоо, судалгааг гүйцэтгэн хөтөлбөрийг хэрэгжүүлэх нефтийн компаниудын нэрс, олгох санхүүжилтийн дүнг тооцоолох, Монголбанкнаас банкуудтай зээлийн шугамын гэрээ, санхүүгийн үүсмэл хэрэгслийг ашиглах гэрээ байгуулах, 6 оролцогч банкны (ХХБ, Голомт, Хаан, Капитал, Хадгаламж, Хас) зүгээс хэрэгжүүлэгч 13 (Магнай трейд ХХК, Шунхлай ХХК, НИК ХХК, Содмонгол ХХК, Ойн бирж ХХК, Синчи Ойл ХХК, Ундарга Увс ХХК, Хөрс Автосервис ХХК, Петрожамп ХХК, Монпетекс ХХК, Жаст-Ойл ХХК, Монсуль ХХК, Рысжан ХХК) компанийн зээлийн судалгааг гүйцэтгэх, хоёр төрлийн гэрээ байгуулах зэрэг ажлууд тус тус гүйцэтгэснээр зээлийн шугамыг ашиглах нөхцлийг бүрдүүллээ. Өнөөдрийн байдлаар дараах компаниудад санхүүжилтийг шилжүүлсэн байна.

Зээлийн шугам	Оролцогч банк	Хэрэгжүүлэгч компани	Санхүүжилт (тэрбум төгрөг)	Санхүүжилт шилжүүлсэн огноо	Форвард хэлцлийн хугацаа
1 дэх	Хадгаламж	Жаст Ойл ХХК	7.1	2012.11.27	2 сарын дараа
2 дахь	Капитал	Монпетекс ХХК	8.5	2012.11.27	2 сарын дараа
3 дахь	Голомт	Содмонгол ХХК	11.1	2012.12.03	2,4,6 сарын дараа
4 дэх	Голомт	Магнай трейд ХХК	14.6	2012.12.04	2 сарын дараа
5 дахь	ХХБ	Шунхлай ХХК	21.4	2012.12.06	2 сарын дараа
Нийт ашигласан зээлийн шугам        62.8

Дээрх санхүүжилт нь 1 жилийн хугацаатай, 3.8 хувийн хүүтэйгээр импортлогч компаниудад олгогдож байна. Дэд хөтөлбөрт заасны дагуу Монголбанк нь оролцогч банкаар дамжуулан хэрэгжүүлэгч компаниудад тодорхой хугацааны дараа худалдах форвард хэлцлийг хамгийн бага зардлаар гүйцэтгэж, ханшийн эрсдлийг нь буурууллаа.

Ийнхүү зээлийн шугамын болон санхүүгийн үүсмэл хэрэгслийн гэрээгээ оролцогч банкуудтай байгуулсан хэрэгжүүлэгч таюан компани нь нийтдээ 62.8 тэрбум төгрөгийн зээлийн шугамыг ашиглаад байна.
 
Махны нөөц бүрдүүлэх, үнийг тогтворжуулах дэд хөтөлбөрийн хүрээнд анхны зээлийн шугамыг Хадгаламж банкаар дамжуулан “Жаст Агро” ХХК-д нэг жилийн хугацаатай 30.0 тэрбум төгрөгийн санхүүжилтийг 3.8 хувийн хүүтэйгээр олгоод байна.

Дэд хөтөлбөрийн талаарх дэлгэрэнгүй мэдээллийг Монголбанкны цахим хуудасны “Үнийг тогтворжуулах хөтөлбөр” цэснээс үзнэ үү.