Уимбльдон, US Open, олимпийн наадам гээд 2012 онд гурван ч том тэмцээний түрүү хүртсэн Серена Уилльямс WTA холбооны Оны шилдэг теннисчнээр тодорчээ. Улирлыг тааруухан эхлүүлж, оны анхны “Их дуулга” Австралийн нээлттэй тэмцээний дөрөвдүгээр тойргоос хасагдсан ч тэрбээр дөрөв, тавдугаар сард Чарльстон болон Мадридын тэмцээнд түрүүлж, энэ жил 50 тоглолт хийснээс 48-д ялж, дэлхийн чансааны гурав хүртэл ахисан юм.

Өдгөө 31 настай тэрбээр Стамбулд болсон оны сүүлчийн “WTA Tour Championships” тэмцээний финалд Мария Шараповаг ялснаар энэ жилийг ялалтаар үдэж байна. Түүний хувьд өдгөө Виктория Азаренка, Шарапова нарын дараа дэлхийн чансаанд гуравдугаарт эрэмбэлэгдээд буй. Гэхдээ ирэх нэгдүгээр сард Австралийн нээлттэй тэмцээнд түрүүлбэл дэлхийн тэргүүн теннисчин цолоо эргүүлэн авах боломжтой.

Серена өмнө нь 2002, 2008 болон 2009 онд Оны шилдэг эмэгтэй теннисчнээр шалгарч байжээ.