УИХ-ын эрхэм гишүүн, албан ёсоор нэрээ аваагүй ч МАХН-ын төлөөлөл Ц.Шинэбаяр тун товчхон болж өнгөрсөн хаврын чуулганы нээлт дээр үг хэлэх хүсэлт тавьжээ. Гэвч УИХ-ын дарга Д.Дэмбэрэл түүнд зөвшөөрөл олгоогүй аж. Хуу­лийн дагуу чуулганы нээлт дээр УИХ-ын дарга үг хэлдэг, Монгол Улсын Ерөнхийлөгч тааллаараа оролц­дог тул хувь гишүүн үг хэлэх боломжгүй гэжээ. Иймд Ц.Шинэбаяр гишүүн хэлэх боломж олдоогүй үгээ сэтгүүлчдээр дамжуулахаар хэв­лэлийн бага хурал хийлээ.

Тэрбээр “Парламентад сөрөг хүч­ний дуу хоолой байхгүй, УИХ нь Засгийн газартаа хариуцлага тоо­цож чадахаа больсон, авлигатай бус АТГ-ын дарга нартай тэмцдэг, бүтээн байгуулалт гэж үлгэр ярьдаг, сонгууль шударга бус болдог нь тогтолцоондоо бус намууд, улстөрч­дөөс хамаардаг” гэв. Нэгэнт сөрөг дуу хоолой сонсохыг хүсдэггүй ийм хариуцлагагүй парламент байгаа тул Ц.Шинэбаяр гишүүн хаврын чуулганы ихэнх хугацааг өөрийг нь сонсох хүсэлтэй ард түмэн дунд өнгөрөөж тэдэнд үгээ хэлэхээр шийд­жээ.

Тэрбээр “УИХ-ын 2008 оны сон­гуулиас хойш намрын гурав, хаврын гурван чуулганы нээлт болоход сөрөг хүчний дуу хоолой нэг ч удаа сонсогдоогүй, цөөнхгүй тул пар­ламент хоёр намын  шийдвэрийг л биелүүлдэг болсноор ардчилал алга болсон” гэв. УИХ нь Засгийн газартаа хариуцлага тооцож чадахаа больсны бодит жишээг тэрбээр Эрдэс баялаг, эрчим хүчний сайдыг огцруулах ту­хай УИХ-ын гишүүдийн саналыг чуулганаар хэрхэн хэлэлцсэнээс харж болно гэлээ. УИХ-ын гишүүн Ц.Шинэбаяр “МАХН-ыг Улсын дээд шүүх бүртгэх эсэх тухай хариу өгөлгүй хуулийн хугацааг хэтрүүлсэн. Үндсэн хуулийн Цэцэд намын нэрийн асуудлыг өгсөн. Цэц өмнө нь үүгээр нэг удаа хариу өгсөн. Нэг асуудалд Цэц хоёр удаа хариу өгдөггүй. Иймд МАХН гэдэг нэрээ авсанд тооцож байгаа” гэж сэтгүүлчийн асуултад хариулахдаа мэдэгдэв. УИХ-д сууж ажилла гэж сон­гогчид мандат өгсөн байхад гадуур ажиллана гэдэг нь зүйд нийцэх эсэхийг тодруулсан сэтгүүлчийн асуул­тад Ц.Шинэбаяр гишүүн “Би ард түмний язгуур эрх ашгийн төлөө ажиллахаар тангараг өргөсөн” гэсэн хариу өгөв. Мөн тун удахгүй Монгол Улсын Ерөнхийлөгчид нээлттэй захи­дал илгээхээр болсноо мэдэгдлээ.