УИХ-ын чуулганыг өчигдөр хуралдуулахаар тов зарлаад байсан ч гишүүдийн ирц бүрдээгүй гэсэн шалтгаанаар хойшлуулсан билээ. Ингээд өнөөдөр 10.00 цагт УИХ-ын чуулганыг хуралдуулж, УИХ-ын зарим гишүүний бүрэн эрхийг хүлээн зөвшөөрөх тухай зэрэг хэд хэдэн асуудлыг хэлэлцэх юм. Өөрөөр хэлбэл, гишүүний бүрэн эрхийн талаар СЕХ-ноос танилцуулснаар МАН-аас намын жагсаалтаар нэр дэвшигч Д.Сарангэрэл, УИХ-ын сонгуулийн 10 дугаар тойрогт АН-аас нэр дэвшиж, гишүүнээр сонгогдсон Г.Батхүү, Д.Зоригт нар тангараг өргөх боломжтой болох юм.

Мөн өнөөдрийн чуулганаар дараах асуудлыг хэлэлцэхээр төлөвлөжээ. Үүнд:

Тэсэрч дэлбэрэх бодис, тэсэлгээний хэрэгслийн эргэлтэд хяналт тавих тухай хуулийн шинэчилсэн найруулгын болон Тэсэрч дэлбэрэх бодис, тэсэлгээний хэрэгслийн эргэлтэд хяналт тавих тухай хуулийг хүчингүй болсонд тооцох тухай хуулийн төслүүд /хэлэлцэх эсэх/:

• Хууль санаачлагчийн илтгэлийг Уул уурхайн сайд Д.ГАНХУЯГ танилцуулна;
• Аюулгүй байдал, гадаад бодлогын байнгын хорооны санал, дүгнэлтийг Улсын Их Хурлын гишүүн М.БАТЧИМЭГ танилцуулна.
• Татварын мэргэшсэн зөвлөхийн үйл ажиллагааны тухай, Аж ахуйн үйл ажиллагааны тусгай зөвшөөрлийн тухай хуульд нэмэлт оруулах тухай, Улсын тэмдэгтийн хураамжийн хуульд нэмэлт оруулах тухай хуулийн төслүүд /хэлэлцэх эсэх/:
•  Хууль санаачлагчийн илтгэлийг Улсын Их Хурлын гишүүн Ц.ДАВААСҮРЭН танилцуулна;
• Төсвийн байнгын хорооны санал, дүгнэлтийг Улсын Их Хурлын гишүүн Ж.ЭРДЭНЭБАТ танилцуулна.