Банкны байр руу /Налайх дүүрэг дэх/ зэвсэглэн нэвтэрч, бусдын амь насыг хохироосон А.Бат-Ялалтын үйлдсэн хэргийн гэм бурууг өчигдөр Налайх дүүргийн шүүхэд шүүж, арав гаруй цаг үргэлжилсэн шүүх хурлаас түүнд ялын дээд хэмжээ буюу цаазаар авах ял оноосон юм. Албаны эх сурвалж “А.Бат-Ялалтыг одоогоор Ганц худаг буюу Цагдан хорих 461 дүгээр ангид хорьсон хэвээр байгаа. Учир нь цаазаар авах ял авсан ялтны хэргийг өөрөө дараагийн шатны шүүхэд хандаагүй ч Улсын дээд шүүхэд хянан хэлэлцдэг. Тиймээс Улсын дээд шүүхийн шийдвэр гартал түүнийг Ганц худагт хорих болно” гэлээ. 

А.Бат-Ялалт нь өнгөрсөн хоёрдугаар сарын 03-ны өдөр Налайх дүүргийн Хаан банкны салбарт сэтгүүлчийн нэр барин нэвтэрч, тус салбарын захирал н.Туяагийн нөхрийг буудан хөнөөсөн юм. А.Бат-Ялалтын ойр дотны нэрээ хэлэхийг хүсээгүй эх сурвалжийн хэлснээр А.Бат-Ялалт нь 1986 онд Улаанбаатар хотод төржээ. Хүмүүжил сайтай, онц сурлагатай хүүхэд байсан учир сурагч солилцооны шугамаар АНУ-д суралцаж байсан гэнэ. Тэрбээр эхнэр,хүүхдийн хамт амьдардаг байжээ.

А.Бат-Ялалт хэрэг үйлдсэнийхээ дараахан Ганц худагаас гэрийнхэндээ бичсэн захидалдаа “Би энэ хэргийг зориудаар хийгээгүй. Намайг хэн нэгэн хорлосон. Би үнэхээр хүн буудъя гэж бодоогүй. Банкинд их хүнтэй байсан болохоор захирлаар нь мөнгө бэлтгүүлж авах гэж байсан юм. Гэтэл нөхөр нь хаалга эвдээд орж ирэх үед сум алдсан. Надад лав нэг хорлол хийсэн байх” гэсэн байжээ.