Энэ оны арваннэгдүгээр сарын 17-ны өдөр Нийслэлийн Налайх дүүрэгт, хаагдсан уурхайн талбайд нүүрс олборлож байгаад уурхайн нуралт үүссэний улмаас иргэн С.Гэндэннамжир, Б.Бямбажав, Б.Баярхүү нар харамсалтайгаар амь насаа алдсанд талийгаачдын гэр бүл, үр хүүхэд, төрөл төрөгсдөд Засгийн газрын нэрийн өмнөөс болон хувиасаа гүн эмгэнэл илэрхийлж байна.

Засгийн газраас иргэдээ ажилтай, орлоготой болгох зорилт тавин ажиллаж байгаа энэ үед хөдөлмөрийн аюулгүй ажиллагааг бүх талаар найдвартай хангах нь төрийн байгууллагын нэн тэргүүний анхаарах асуудал билээ.

Бичил уурхайн үйл ажиллагааг зохицуулахтай холбогдсон эрх зүйн орчин, зохион байгуулалтыг цаашид боловсронгуй болгох, ард иргэдийнхээ эрүүл, аюулгүй орчинд ажиллаж амьдрах таатай нөхцлийг бүрдүүлэхийн тулд шинэчлэлийн Засгийн газраас шаардлагатай бүхий л арга хэмжээг тууштай авч ажиллах болно.