УИХ-ын чуулганы нэгдсэн хуралдааны төгсгөлд Монгол Улсын 2013 оны төсвийн тухай хуулийн эцсийн найруулгыг хийлээ. Төсвийн задаргаан дээр Дорноговь аймгийн Хатанбулаг сумыг Алтанбулаг гэж бичсэн зэрэг мэр сэр алдаа гарсныг энэ үеэр зассан юм. Гишүүд Сангийн яам тааруу ажилласан байна гэсэн зэмлэл хэлцгээсэн ч Ч.Улаан сайд ирэх оны төсвийг батлахад Сангийн яам маш бага оролцсон. Эдийн засгийн яам төсөв дээр дагнасан хэмээн зэмлэлээс “бултав”.

Үүний дараа УИХ-ын дарга З.Энхболд өнөөдөр үдээс хойш гаргасан чуулганыг түр завсарлуулах тухай захирамжаа эрхэм гишүүдэд танилцуулав. Захирамжид 2014-2016 онд улс, орон нутгийн төсвийн хөрөнгөөр санхүүжүүлэх хөрөнгө оруулалтыг төлөвлөх асуудлаар иргэдтэй санал солилцох зорилгоор УИХ-ын 2012 оны намрын ээлжит чуулганыг арваннэгдүгээр сарын 12-ноос 20-ны өдөр хүртэл түр завсарлуулахаар тусгажээ. Энэ ажлыг нэг л удаа хийх тул ирэх жилүүдэд ингэж завсарлуулахгүй гэдгийг УИХ-ын дарга гишүүдэд танилцуулаа.

Чуулганы түр завсарлагын үеэр Чингис хааны төрсөн өдөр тохионо. Энэ өдрөөр нийслэлд байх гишүүд Төрийн ордонд үндэсний хувцастай ирж ёслолд оролцохыг УИХ-ын дарга хүслээ. Арваннэгдүгээр сарын 20-ноос байнгын хороод хуваарь ёсоор хуралдаж эхлэхийг мөн санууллаа.

Үүгээр өнөөдрийн чуулганы нэгдсэн хуралдаан өндөрлөв.