Олимпийн жил болдог насанд хүрэгчдийн ангиллын цорын ганц ДАШТ болох багийн дэлхийн аварга шалгаруулах тэмцээн Бразилийн Сальвадор хотноо өчигдөр эхэллээ. Амралтын өдрүүдэд үргэлжлэх багийн ДАШТ-д амжилтаараа дэлхийд ноёлж буй шилдэг багууд өрсөлдөж байна.

Эмэгтэйчүүдийн барилдаан өчигдөр болж, жүдо бөхийн өлгий нутаг гэгдэх Японы бүсгүйчүүд түрүүлжээ. Тэд шигшээ барилдаанд БНХАУ-ын багтай хүнд тулаан хийж, 3-2 харьцаатай ялалт байгуулсан байна. Японы багаас 52 кг-ын жинд Юүки Хашимото, 57 кг-д Анзү Ямамото, мөн +70 кг-ын жинд Мегүми Тачимото нар учраагаа ялснаар багтаа ялалт авчирчээ. Японы жүдочид хэсгийн барилдаанд Их Британи болон Бразилиийн багийг ялж, хагас шигшээд Кубын тамирчдыг ялснаар финалд шалгарсан. Багийн ДАШТ-ий хүрэл медалийг Бразили болон Кубын тамирчид хүртсэн байна.

Монголын жүдочдын тухайд медалийн төлөөх барилдаанд Бразилийн багт ялагдсан. Хэсгийн барилдаанд Украйныг 3-2, дараа нь БНСУ-ын жүдочдыг мөн 3-2 харьцаатай буулган авсан ч хагас шигшээ барилдаанд Хятадын багт 2-3 оноогоор дийлдэж, улмаар хүрэл медалийн төлөө Бразилийн багтай өрсөлдөн 5-0 харьцаатай ялагджээ.

Эрэгтэйчүүдийн барилдаан өнөөдөр орой Монголын цагаар 20.30 цагт, харин шигшээ барилдаан  03.00 цагт эхлэх хуваарьтай байна. Д.Төмөрхүлэг /66 кг/,  Г.Одбаяр /73 кг/, Г.Түвшинжаргал /81 кг/, Б.Жанчивдорж /-90 кг/, Б.Тэмүүлэн /+90 кг/ нарын бүрэлдэхүүнтэй Бразилийг зорьсон эрэгтэй жүдочид “D” хэсэгт сугалаа татсан бөгөөд хэсгийн эхний барилдаанд БНСУ-ын багтай барилдана. Ялбал Аргентин болон Алжирийн багийн ялсантай нь өрсөлдөх юм.