УИХ-ын чуулганы нэгдсэн хуралдаан өнөөдөр 10.00 цагт зарлагдсан ч 11.00 цаг дөхүүлж байж эхэллээ. Гэхдээ УИХ-ын гишүүдийн ирц хангалтгүй байгаа юм. УИХ-ын гишүүн Ц.Нямдорж УИХ дахь Ардчилсан намын бүлгийн гишүүдийг ирцээ бүрдүүлэхийг шаардлаа. Одоо чуулганы танхимд тус бүлгээс ердөө зургаахан гишүүн байгаа юм. Тэрээр УИХ-ын даргад хандан “Юм хүчиндэх болохоор ирцээ бүрдүүлдэг, огцруулах болохоор бүх гишүүн нь орж ирдэг байж таарахгүй. “Шударга ёс” эвслээс хэдэн гишүүн, бие даагч гишүүд, дээр нь МАН-ын гишүүд байгааг эс тооцвол Ардчилсан намын гишүүдээс ердөө зургаан гишүүн байна. Ийм байдлаар асуудалд хандаж болохгүй” гэлээ. УИХ-ын даргын зүгээс Ардчилсан намын бүлгийн даргад хандан гишүүдийнхээ ирцийг бүрдүүлэхийг анхааруулав.
Ирц тааруу байсан ч УИХ-ын чуулганы нэгдсэн хуралдаанаар Хууль, Улсын Их Хурлын тогтоолын төслүүд буцаах тухай Улсын Их Хурлын тогтоолын төслийг хэлэлцээд гишүүдээс санал хураалгахад “Буцаах шаардлагагүй” гэсэн шийдвэр гарлаа.
Г.ДАРЬ